Avropa

Ana səhifə

Avropa

BQXK rəhbəri təşkilatın maliyyə çətinlikləri ilə üzləşdiyini açıqlayıb

27 may 2011 08:00 (UTC +04:00)

Bakı – APA. Beynəlxalq Qızıl Xaç Komitəsinin (BQXK) rəhbəri Yakob Kellenberger qurumun 2010-cu il üzrə illik hesabatını Cenevrədə keçirilən mətbuat konfransında açıqlayıb. BQXK-nin Azərbaycan nümayəndəliyindən APA-ya verilən məlumata görə, Y. Kellenberger təcili maliyyə dəstəyi üçün beynəlxalq ictimaiyyətə müraciət edib: “Dünya maliyyə böhranı bir çox donor dövlətlərə öz təsirini göstərib ki, bu da öz növbəsində humanitar fəaliyyət üçün lazım olan maliyyə resurslarına da mənfi təsir göstərir. Bu maliyyə çətinlikləri müharibə şəraitində olan dövlətlərdə baş qaldıran ciddi humanitar ehtiyaclara cavab verilməsində əlavə çətinlik yaradır”.

Y. Kellenberger deyib ki, Fil Dişi Sahillərində gözlənilmədən baş qaldıran fövqəladə hala və Liviyada son vaxtlar baş verən zorakılıqlara dərhal reaksiya verilməsini təmin etmək üçün ciddi tədbirlər görülməlidir: “Hər iki ölkədə BQXK bütün tərəflərlə əlaqəsinin olması, eləcə də neytral və müstəqil yanaşması sayəsində ehtiyacı olanlara dərhal yardım göstərə bilən azsaylı təşkilatlardan biri olub. Lakin biz həm yerlərdə, həm də baş qərargahda operativ və infrastruktur xərclərimizi nəzərdən keçirməli olduq. Bu, bizi 2011-ci ildə yerlərdəki fəaliyyətimiz üçün ayrılmış 1,046 milyard İsveçrə frankının 7,6 faizinə, yəni 80 milyon İsveçrə frankı məbləğində vəsaitə qənaət etməyə məcbur etdi. Bu, uzun sürən münaqişələrdən əziyyət çəkən insanlara səhiyyə, su və sanitariya, ərzaq təhlükəsizliyi sahəsində yardımı nəzərdə tutan proqramların hesabından 40 milyon İsveçrə frankı məbləğində vəsaitin ixtisara salınmasını tələb edən ağrılı bir proses idi. Bizim yardımlarımıza ehtiyacı olan insanlarla əlaqə yaratmaq bir çox yerlərdə hələ də çətin olaraq qalmaqdadır”.

BQXK prezidenti bəyan edib ki, Haitidəki zəlzələ, Pakistanda gözlənilməz ölçüdə baş verən daşqınlar, Qırğızıstandakı etnik qarşıdurma, Malinin şimalında və Nigerdəki uzun sürən quraqlıq köməyə ehtiyacı olan insanların sayını ağlasığmaz dərəcədə artırıb. Bundan əlavə, bütün dünyada milyonlarla insan həll edilməmiş münaqişələrdən əziyyət çəkir.

2010-cu ildə BQXK-nin xərcləri 1,1 milyard İsveçrə frankını aşıb. (Təxminən 1,25 milyard ABŞ dolları və ya 890 milyon Avro). BQXK ən çox Pakistan, Əfqanıstan, İraq, Somali, Konqo Demokratik Respublikası, İsrail və işğal olunmuş ərazilərdə maliyyə sərf edir.