Döyüş növləri

Ana səhifə

Döyüş növləri

YAP rayon təşkilatları arasında mərhum prezident Heydər Əliyevin anadan olmasının 84-cü ildönümünə həsr olunan mini-futbol turnirinə start verilib

23 aprel 2007 17:04 (UTC +04:00)

Yeni Azərbaycan Partiyasının (YAP) rayon təşkilatları arasında mərhum prezident Heydər Əliyevin anadan olmasının 84-cü ildönümünə həsr olunan mini-futbol turnirinə start verilib. “APA-Sport” agentliyinin məlumatına görə, turnirin açılış mərasimində YAP sədrinin müavini, millət vəkili Əli Əhmədov çıxış edərək, YAP-ın qurucusu Heydər Əliyevin gənclərlə bağlı siyasətindən danışıb. O, bildirib ki, bu siyasətdə əsas məqsəd ölkə gənclərinin fiziki və mənəvi cəhətdən sağlamlığı olub: “Bu yarışın keçirilməsi YAP sıralarındakı gənclərin ümummilli liderə hörmət və ehtiramının əyani nümayişidir. Heydər Əliyevin güvəndiyi gənclik həmişə onun etimadını doğruldub və beynəlxalq aləmdə Azərbaycanın şərəfini layiqincə qoruyub”.
Daha sonra “İnter” klubunun prezidenti Georgi Nikolov öz nitqində gənclərin fiziki tərbiyəsində bu cür yarışların əhəmiyyət kəsb etdiyini vurğulayıb. YAP sıralarında istedadlı futbolçuların olduğunu nəzərə çatdıran G.Nikolov mini-futbol turnirinin keçirilməsində Heydər Əliyev şəxsiyyətinə ehtiramın əsas təşkil etdiyini söyləyib.
Turnirin oyunları “Şəfa” stadionunun süni örtüklü meydançasında keçirilir. Qalib adı uğrunda YAP-ın Sabunçu, Nəsimi, Yasamal, Əzizbəyov, Suraxanı, Qaradağ, Xətai, Nərimanov, Səbayel və Binəqədi, Abşeron və Sumqayıt şəhər təşkilatlarının komandaları mübarizə aparırlar. /APA-Sport/