Tərtər sakini şəxsi kitabxanasına 12 mindən artıq kitab toplayıb. Onların içərisində yaşı 300-dən çox olan kitab da yer alır.
APA-nın yerli bürosunun məlumatına görə, rayon sakini Rauf Həsənzadə şəxsi kitabxanasında yer alan kitabların çoxunu 1980-ci illərdə elektromexanika zavodunun direktoru işləyən zaman keçmiş SSRİ-nin müxtəlif şəhərlərinə ezam olunarkən topladığını bildirib.
Həmin kitablar içərisində ensiklopediyalar, dünya ədəbiyyatından, xalq təbabətindən bəhs edən kitablar daha çox üstünlük təşkil edir.
Kitabxanada yüzlərlə kitabın yaşı 70-dən, 18 kitabın yaşı 200-dən artıqdır. Ən çox yaşı olan kitab isə 1717-ci ildə Birinci Pyotrun sərəncamı ilə çap olunmuş “Məişətdə davranış qaydaları” kitabıdır. Həmin kitab cəmi yüz nüsxədə çap edilib və zadəgan ailələrin məişət davranışlarını təbliğ edir.
Kitabxanasında nadir kitablarla yanaşı qədim-tarixi sənədlər, həmçinin qəzet və jurnallar da yer alır. Həmin sənədlər bilavastə ermənilərin ölkəmizə qarşı ərazi iddialarını ifşa edir.
Elgün Gəncimsoy