“S&P Global Ratings” beynəlxalq reytinq agentliyi Azərbaycan Mərkəzi Bankının valyuta ehtiyatları ilə bağlı proqnozunu açıqlayıb.
"APA-Economics" xəbər verir ki, “S&P"nin proqnozuna əsasən, bu il AMB-nin valyuta ehtiyatları 7,489 milyard (2021-ci ilə nisbətən 5,8% çox) dollar təşkil edəcək.
“S&P" hesab edir ki, 2023-cü ilə AMB-nin ehtiyatları 7,731 milyard dollara, 2024-cü ildə 7,782 milyard dollara kimi yüksələcək. 2025-ci ildə isə bu rəqəm bir qədər azalaraq 7,743 milyard dollara bərabər olacaq.
Qeyd edək ki, iyulun 8-də Beynəlxalq Valyuta Fondu (BVF) AMB-nin valyuta ehtiyatları ilə bağlı proqnozunu açıqlamışdı. BVF-nin proqnozuna görə 2022-ci ildə AMB-nin valyuta ehtiyatları 7,275 milyard manat olacaq. Bu isə “S&P"nin proqnozu ilə müqayisədə aşağıdır.
“S&P Global Ratings” həmçinin manatın məzənnəsinin 2026-ci ilə kimi sabit qalacağını proqnozlaşdırıb. Bildirilib ki, Azərbaycan Mərkəzi Bankının (AMB) valyuta bazarına müntəzəm müdaxilələri ilə manatın məzənnəsi bir dollar üçün 1,7 manat səviyyəsində sabit qalacaq.