"Neft Daşları"nda 10 quyunun qazılması layihələndirilib

"Neft Daşları"nda 10 quyunun qazılması layihələndirilib
  • Clock-gray 13:01
  • calendar-gray 05 Noyabr 2019

Xəzər dənizinin Azərbaycan sektorunda yerləşən "Neft Daşları" yatağında hazırda qazma işi aparılan 331 saylı meydançadan hər birinin gözlənilən gündəlik hasilatı 10 ton neft olmaqla 10 quyunun qazılması layihələndirilib.

"APA-Economics"in məlumatına görə, bunu SOCAR-ın İctimaiyyətlə əlaqələr və tədbirlərin təşkili idarəsinin rəis müavini İbrahim Əhmədov "Neft Daşları"na təşkil edilmiş media-tur zamanı deyib.

Onun sözlərinə görə, burada ilk quyunun qazılmasına bu ilin may ayında başlanılıb və artıq 4 quyu qazılıb. Bu quyuların gündəlik neft hasilatı 48 ton təşkil edir.

"Hazırda 5-ci quyuda quyudibi 830 metr olmaqla qazma işi davam etdirilir", - deyə İ. Əhmədov qeyd edib.

Onun sözlərinə görə, "Neft Daşları" uzun müddət ərzində istismar olunmasına baxmayaraq, yataqdan çıxarılan məhsulda suyun nisbəti cəmi 35%-dır ki, bu da belə yaşlı yataq üçün yaxşı nəticə hesab olunur.

Aparılmış səmərələşdirici tədbirlər nəticəsində son 25 ildə "Neft Daşları" NQÇİ üzrə neft hasilatı 20% artaraq 2018-ci ildə 1 mln. tondan artıq olub.

Bununla yanaşı, İ. Əhmədovun sözlərinə görə, NQÇİ tərəfindən 2019-cu ilin 9 ayı ərzində 790 min ton neft və 72 mln. kubmetr qaz hasil edilib.

Hazırda yataq üzrə qalıq ehtiyatlar 210 mln. ton, çıxarıla bilən ehtiyatlar isə 18-20 mln. ton civarındadır. İstisna deyil ki, gələcəkdə yeni texnologiyalar vasitəsi ilə qalıq ehtiyatların çıxarılma nisbəti yüksələ bilər.

Xatırladaq ki, "Neft Daşları" yatağının sənaye əhəmiyyətli işlənilməsi 1951-ci ildən başlayıb.

Emil İsmayılov

Digər xəbərlər

Arxiv

date