Ombudsman Zəngilanda azərbaycanlı qəbirlərinin Ermənistan tərəfindən dağıdılmasına münasibət bildirib

Ombudsman Zəngilanda azərbaycanlı qəbirlərinin Ermənistan tərəfindən dağıdılmasına münasibət bildirib
# 05 dekabr 2022 21:29 (UTC +04:00)

Azərbaycan Respublikasının İnsan Hüquqları üzrə Müvəkkili (Ombudsman) Səbinə Əliyeva Zəngilan rayonunda azərbaycanlılara məxsus qəbirlərin işğal dövründə Ermənistan tərəfindən dağıdılması faktına münasibət bildirib.

APA-nın xəbərinə görə, Ombudsman bildirilib ki, “sosial şəbəkələrdə Ermənistanın azərbaycanlılara qarşı törətdiyi vandalizm aktlarını özündə əks etdirən növbəti video yayılıb. Videodan da göründüyü kimi işğaldan azad edilmiş Zəngilan rayonunda soydaşlarımızın dəfn olunduğu qəbiristanlıqdakı məzarlar ermənilər tərəfindən qəsdən dağıdılmış, qəbir abidələri tanınmaz hala salınmışdır.

Bütün bu faktlar Ermənistanın hərbi-siyasi rəhbərliyinin uzun illər ərzində Azərbaycana qarşı etnik və dini zəmində nifrət, düşmənçilik, dözümsüzlük və vandalizm siyasətini həyata keçirdiyini əyani şəkildə sübut edir.

Azərbaycanlılara məxsus qəbirlərin vəhşicəsinə dağıdılması “Silahlı münaqişə zamanı mədəni sərvətlərin qorunması haqqında” 1954-cü il tarixli Haaqa Konvensiyasının, YUNESKO-nun 1972-ci il tarixli “Ümumdünya mədəni və təbii irsin qorunması haqqında” Konvensiyasının və 1954-cü il tarixli Avropa Mədəniyyət Konvensiyasının tələblərinin kobud şəkildə pozulmasıdır.

Azərbaycanın işğaldan azad edilmiş ərazilərindəki dini abidələrin, qəbiristanlıqların dağıdılaraq təhqir edilməsi, eyni zamanda həmin ərazilərin minalanması faktlarını şiddətlə pisləyir, bir daha beynəlxalq və regional təşkilatları, milli insan hüquqları institutlarını bu kimi çoxsaylı vandalizm əməllərini törətməkdə təqsirkar olan Ermənistanın hərbi-siyasi rəhbərliyinə qarşı beynəlxalq hüquqi məsuliyyət müəyyən edən zəruri tədbirlər görməyə çağırıram”.

#
#

ƏMƏLİYYAT İCRA OLUNUR