İranda parlament seçkilərində iştirak etmək üçün 16 mindən çox insan qeydiyyatdan keçib.
APA-nın Tehran bürosunun məlumatına görə, bu barədə İran Seçki Komissiyasının rəhbəri Camal Orf bildirib. 11-ci çağırış parlament seçkilərində namizədlərin qeydə alınması prosesi ilə bağlı statistikanı təqdim edən C.Orfun sözlərinə görə, 15 618 namizədin qeydiyyatı başa çatıb:
"Ölkədə yaranmış internet probleminə görə, bəzi qeydiyyatlar əllə aparılıb və həmin şəxslərin qeydiyyatı sistemə oturmayıb. Onların da sistemə oturması ilə bu rəqəm 16 145-ə çata bilər".
Onun sözlərinə görə, qeydə alınan namizədlərin 88%-i kişilər, 12%-i qadınlardır.
O bildirib ki, namizədliyi qeydə alınanlardan 3 209 nəfər 36 yaşdan 40 yaşa qədər, 2 837 nəfər isə 42-45 yaş arasındadır.
Qeyd edək ki, İranda parlament seçkilərinə qatəlacaq namizədlərin qeydiyyatı dekabrın 1-dən 7-dək aparılıb.
İranda 11-ci çağırış parlament seçkiləri 2020-ci il fevralın 21-də keçiriləcək.