“Vergi Məcəlləsinə təklif edilən dəyişikliklər 5 blok üzrə cəmləşdirilə bilər”.
APA-nın məlumatına görə, bunu Milli Məclisin İqtisadi siyasət, sənaye və sahibkarlıq komitəsinin bu gün keçirilən iclasında Vergi Məcəlləsinə təklif edilən dəyişikliklərin müzakirəsi zamanı Dövlət Vergi Xidmətinin İdarə rəisi Nicat İmanov deyib.
Onun sözlərinə görə, layihəyə aşağıdakı istiqamətlər üzrə mühüm dəyişiklikləri əhatə edən müddəalar daxil edilib: "Bunlar Vergi bazasının genişləndirilməsi və ofşor zonalarda aparılan əməliyyatları əhatə edən vergi nəzarətinin gücləndirilməsi; Sosial xarakterli güzəştlər vasitəsi ilə əhalinin maliyyə (vergi) yükünün azaldılması, habelə sosial dəstək çərçivəsində bank sektorunun vergi yükünün azaldılması; Sahibkarlıq subyektlərinin vergi yükünün azaldılması və sahibkarlıq fəaliyyətinin təşviq edilməsi; Kölgə iqtisadiyyatına qarşı mübarizə çərçivəsində vergidən yayınma hallarının qarşısının alınması; Vergi borclarının yığılmasının effektivliyinin artırılması məqsədilə inzibatçılığın gücləndirilməsi, habelə vergi borclarının alınmasına möhlət verilməsi mexanizminin təkmiləşdirilməsidir".
İdarə rəsii bildirib ki, ilk olaraq aksizli məhsulların dərəcələrində artım olacaq: “Məhz zərərli məhsullar üzrə istehlakın azaldılması üçün nəzərdə tutulan addımlardan biri də vergilərin artırılması ilə bağlıdır. Məcəllədə dəyişiklik istiqamətində alkoqollu içkilər üzrə və tütün məhsullarında artım nəzərdə tutulur. Digər tərəfdən, ölkənin ekoloji mühitinin qorunmasında mühərrikinin həcmi 3000 kub/sm-dən yuxarı olan avtomobillərin də aksiz dərəcələrində artım təklif olunur. Eyni zamanda istismar müddəti uzun olan avtomobillərin də aksiz dərəcələrinə yüksəldici əmsalların tətbiqi nəzərdə tutulur. Digər dəyişiklik istiqaməti mədən vergisinə cəlb edilən gips və gəc məhsulları ilə bağlıdır. Sement və xammal üçün tətbiq edilən aksiz dərəcəsinin gipsə və gəcə də tətbiq edilməsi nəzərdə tutulur. Mədən vergisi üzrə vahid yanaşmanın tətbiqi nəzərdə tutulur. Gələcəkdə vergitutma obyektlərinin bərabərləşdirilməsi siyasəti də həyata keçiriləcək”.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
