Mayın 27-də Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin Müşahidə Şurasının növbəti iclası keçirilib.
APA-nın məlumatına görə, iclas zamanı ilk olaraq Agentliyin icraçı direktorunun təyinatı məsələsinə baxılıb və bu bu vəzifəyə Fuad Dərgahlının namizədliyi irəli sürülüb.
Müşahidə Şurasının üzvləri məsələyə münasibət bildirərək F.Dərgahlının namizədliyini yekdilliklə dəstəkləyiblər.
Sonra iclasda Agentliyin əməyin ödənişi fondunun, strukturunun, işçilərinin say həddinin və onların əməkhaqlarının məbləğinin layihəsi müzakirəyə çıxarılıb, Müşahidə Şurasının üzvlərinin təklifləri nəzərə alınmaqla təsdiq olunub.
Daha sonra Agentliyin Nizamnaməsindən irəli gələrək daxili qaydaların reqlamentinin hazırlanması ilə bağlı məsələ müzakirə olunub. Sənədin hazırlanması üçün bir neçə Şura üzvündən ibarət işçi qrup yaradılması və qısa müddətdə müzakirəyə çıxarılaraq təsdiq olunması barədə qərar qəbul olunub.
Cari məsələlərin müzakirəsi zamanı Agentliyin texniki təminatı və qarşısında duran vəzifələrə dair fikir mübadiləsi aparılıb.
Qeyd edək ki, Fuad Dərgahlı 10 mart 1974-cü ildə Bakı şəhərində anadan olmuş, 1996-cı ildə N.Tusi adına Azərbaycan Dövlət Pedoqoji Universitetinin Tarix və Dövlət Hüququ fakültəsini bitirib. 1998-ci ildən başlayaraq müxtəlif qeyri-hökumət təşkilatlarında fəaliyyətə başlayıb, sosial, iqtisadi, təhsil sahələrində layihə və proqramların icrasına cəlb olunub. Avropanın bir sıra ölkələrində və ABŞ-da vətəndaş cəmiyyəti sahəsində proqramlarda iştirak edib. Dünyanın 20-dən çox ölkəsində keçirilən təlim, seminar və konfranslarda Azərbaycan vətəndaş cəmiyyətinin nümayəndəsi kimi təmsil olunub. 2012-ci ildən “Savadlı Cəmiyyət” Müasir Təhsilə Dəstək İctimai Birliyinin sədri vəzifəsində çalışır.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
