“ABŞ və Avropa İttifaqı tərəfindən çağırılan “Demokratiya uğrunda sammit”in məqsədi Birləşmiş Millətlər Təşkilatını əvəz etməkdir”.
Bunu APA-nın Moskva müxbirinə açıqlamasında Rusiya Siyasi Tədqiqatlar İnstitutunun baş direktoru Sergey Markov bildirib.
Onun sözlərinə görə, ABŞ-ın məqsədi yeni ictimai koalisiya yaradıb, bura əksər dünya ölkələrini toplayıb, daha sonra bu koalisiyanın adından bütün dünya ictimaiyyəti kimi çıxış etməkdir: “Buna səbəb isə ABŞ-ın BMT-də dominantlıq edə bilməməsidir. Çünki orada ABŞ-a BMT-də və dünya ictimaiyyətində diktatura qurmağa imkan verməyən nəhəng ölkələr var. Ona görə də, Amerikada qərara gəliblər ki, ABŞ-ın hegemonluğunu qəbul edən ölkələrin iştirakı ilə özlərinin “ev diktaturası”nı qursunlar”.
S. Markov sammitə dəvət olunmayan Rusiya və Türkiyənin müstəqil xarici siyasət yürütdüyünü söyləyib: “Bu ölkələr ABŞ-ın dünya ictimaiyyətində diktaturasına qarşı çıxırlar. Ona görə də Moskva və Ankara həmin sammitə dəvət olunmayıb. Həmin sammitə dəvət olunan ölkələrin siyahısına baxsaq, onların sırasında hərdən ABŞ-a “yox” deyə biləcək bir Hindistan var. Qalan ölkələr isə ABŞ-ın dünya ictimaiyyətində diktaturası ilə razıdır”.
Rusiyalı ekspert hesab edir ki, indiki halda Moskva və Ankaranın vəzifəsi BMT-ni, bütün ölkələrin üzvü olduğu dünya ictimaiyyətini daha da möhkəmləndirməkdir.
S. Markov demokratiya sammitinin çağırılmasının digər məqsədinin dövlətlərin daxili işlərinə müdaxiləni legitimləşdirməkdən ibarət olduğunu qeyd edib: “Daha cəsur desək, demokratiya sammitinin çağırılması digər ölkələrdə demokratiyanı sındırmaq üçündür”.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
