Bakı. Könül Kamilqızı - APA. Tələbə Qəbulu üzrə Dövlət Komissiyası (TQDK) ali təhsil müəssisələrinə yüksək balla qəbul olmuş gənclərin təcrübəsinin öyrənilməsi, təbliği, onların ictimaiyyətə tanıdılması və rəğbətləndirilməsi üçün silsilə tədbirlər həyata keçirir.
TQDK-nın mətbuat xidmətindən APA-ya verilən xəbərə görə, bu istiqamətdə yaxın günlərdə respublikanın regionlarında prezident təqaüdünə layiq görülmüş gənclərin valideynləri, müəllimləri, həmçinin şagirdləri qəbul imtahanlarında 600-dən yuxarı bal toplayan məktəblərin rəhbərləri ilə görüşlər keçiriləcək.
Bölgələrdə tədbirlər TQDK-nın regional bölmələri vasitəsilə təşkil olunacaq. Görüş iştirakçılarına 600-dən çox bal toplayan gənclər haqqında məlumatların əks olunduğu “Abituriyent” jurnalının 11-ci sayı və müxtəlif hədiyyələr təqdim olunacaq. Tədbirlərin keçirilmə qrafiki komissiyanın internet saytında yerləşdirilib.
Qeyd edək ki, 2013-cü ildə ali təhsil müəssisələrinə keçirilən qəbul imtahanlarında 96720 abituriyent iştirak edib. Onlardan 1617 nəfəri 600 çox bal toplayıb. 102 nəfəri isə Azərbaycan prezidentinin sərəncamı ilə Prezident təqaüdünə layiq görülüb.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
