Ucar. Zahid Abışov – APA. Dünən axşamdan başlayan güclü külək Ucar rayonunda bir sıra problemlərə səbəb olub. APA-nın yerli bürosunun xəbərinə görə, axşam saatlarından rayonun əksər yaşayış məntəqələrinə elektrik enerjisinin verilişi dayandırılıb.
Ucar Elektrik Şəbəkəsinin rəisi Gülxan Zülfüqarovun bildirdiyinə görə, ötən əsrin 60-cı illərində istifadəyə verilən elektrik xətləri güclü küləyə tab gətirməyib, nəticədə 18 elektrik dirəyi aşıb, 3 transformator yanıb, bir neçə yerdə 10 min kilovatlıq xətdə problem yaranıb.
Sonradan Ucar şəhərinin bir hissəsinə enerji verilişi bərpa olunsa da, rayonun kəndlərinə hələ də elektrik enerjisi verilməyib. Hazırda 8 təmir briqadası yerlərdə təmir-bərpa işləri aparır. Axşam saatlarınadək elektrik enerjisi ilə bağlı yaranan problemin tam aradan qaldırılacağı bildirilib.