Bakı. Fərid Mirzəyev – APA. 2015-ci ilin yanvar ayından etibarən Bakı şəhərində diaqnostik qiymətləndirmədən keçən 30 min müəllimin həftəlik dərs yükü norması 1,5 dəfə, aylıq vəzifə maaşı 2 dəfə artırılıb.
APA-nın xəbərinə görə, bu barədə Nazirlər Kabinetinin 2015-ci ildə fəaliyyəti haqqında hesabatda bildirilir.
Hesabatda qeyd olunur ki, Bakı şəhərində müəllim-şagird nisbəti 1:10-dan 1:12 nisbətinə yüksəlib: “Diaqnostik qiymətləndirmənin nəticələrinə əsasən təlimlərə cəlb edilmiş müəllimlərin 78 faizi yekunda öz göstəricilərini yaxşılaşdırmağa müvəffəq olub. Bakı şəhəri ilə yanaşı, respublikanın 3 şəhər (Sumqayıt, Gəncə, Şirvan) və 9 rayonunda (Xaçmaz, Cəlilabad, Masallı, Hacıqabul, Sabirabad, Saatlı, İmişli, Qubadlı, Abşeron) daha 26 minədək müəllimin bilik və bacarıqlarının diaqnostik qiymətləndirilməsi həyata keçirilib və onların da əmək haqları artırılıb. Beləliklə, 2015-ci ildə ölkə üzrə ümumtəhsil məktəbləri müəllimlərin 40 faizinin əmək haqqında əhəmiyyətli artım təmin olunub”.
Hesabatda deyilir ki, növbəti illərdə diaqnostik qiymətləndirmə mərhələlərlə digər bölgələrdə də davam etdiriləcək.