Bakı-APA. Misir prezidenti Abdel Fəttah as-Sisi ölkəsində Rusiya, yaxud başqa bir ölkənin hərbi bazasının olmadığını və olmayacağını bəyan edib.
APA-nın məlumatına görə, Misir prezidenti “Əl-Əhram” qəzetinə müsahibəsində deyib ki, bəzi Misir KİV-ləri araşdırmadan belə informasiyalar yayıblar.
Qeyd edək ki, Rusiyanın “İzvestiya” qəzeti xarici siyasət və hərbi dairələrdəki mənbələrə istinadən Rusiyanın Misirdə hərbi obyektlər, o cümlədən Sidi-Barrani şəhərindəki hərbi hava bazasını icarəyə götürməklə bağlı Qahirə ilə danışıqlar apardığı barədə məlumat yayıb. Bəzi Misir KİV-ləri də bu məlumata səhifələrində yer verib. Ancaq sonradan Misir Prezident Administrasiyasının rəsmi nümayəndəsi Alya Yusef bu informasiyanı təkzib edib.