Sosial

Ana səhifə

Sosial

Fövqəladə Hallar Nazirliyi Lerik rayonunda kompleks mülki müdafiə təlimi keçirib

30 avqust 2012 13:33 (UTC +04:00)

Lerik. Ağəddin Babayev – APA. Fövqəladə Hallar Nazirliyinin (FHN) Lənkəran Regional Mərkəzi avqustun 28-dən 30-a kimi Lerik rayonunda 3 günlük kompleks mülki müdafiə təlimləri keçirib. APA-nın Cənub bürosunun məlumatına görə, son təlim bu gün rayonun Əliabad kəndində yerləşən keçmiş üzüm emalı zavodu ərazisində baş tutub. Təlim prosesi zamanı zəlzələdən sonra zavod ərazisində olan çənlərdə şərti olaraq partlayış olub, nəticədə isə ərazidəki tikililər dağılıb və yanğın baş verib. Təlimata uyğun olaraq ilk növbədə mülki müdafiə qüvvələri hadisə baş verən ərazinin mühafizəsini təşkil edib, əraziyə giriş-çıxış məhdudlaşdırılıb. Bundan sonra baş verən yanğınların söndürülməsi, kimyəvi zəhərlənmə zonasının lokallaşdırılması, partlayış baş verən obyektdə kimyəvi kəşfiyyatın təşkili, axtarış – xilasetmə, zərərçəkmişlərə ilk tibbi yardım göstərilməsi, epidemiya və epizootiyaya qarşı mübarizə, habelə adamların təhlükəsiz ərazilərə təxliyəsi işlərinin aparılması ilə bağlı tapşırıqlar yerinə yetirilib.

Lerik Rayon İcra Hakimiyyəti başçısının müavini, rayon fövqəladə hallar komissiyasının sədri Habil Məlikovun sözlərinə görə, tədbirə 233 nəfərlik şəxsi heyət, 33 maşın cəlb olunub. Mülki müdafiə tədbirlərində rayon rəhbərləri, mülki müdafiə qərargahının rəisi və digər vəzifəli şəxslər iştirak edib. Təlimin keçirilməsində əsas diqqət komandir – rəis heyətinin idarəetmə bacarıqlarına, mülkü müdafiə dəstələrinin şəxsi heyətinin peşəkarlıq səviyyəsinin artırılmasına, xilasetmə və digər təxirəsalınmaz işlərin aparılması zamanı təhlükəsizlik qaydalarına ciddi riayət olunmasına yönəldilib.

FHN _ təlim