Daxili siyasət

Ana səhifə

Daxili siyasət

“Dağlıq Qarabağın Azərbaycan İcması” beynəlxalq təşkilatlara müraciət edib

26 fevral 2010 12:48 (UTC +04:00)

Bakı. Elnur Məmmədli – APA. “Dağlıq Qarabağın Azərbaycan İcması” İctimai Birliyinin rəhbərliyi Xocalı faciəsinin 18-ci ildönümü ilə bağlı beynəlxalq təşkilatlara müraciət edib. APA-nın məlumatına görə, icmanın İdarə Heyəti üzvlərinin keçirdiyi mətbuat konfransında müraciət mətbuata təqdim olunub.

Sənəddə erməni silahlı qüvvələri və 366-cı alayın hücumu nəticəsində 1992-ci il fevralın 25-dən 26-na keçən gecə Xocalıda kütləvi qətl törədildiyi qeyd olunub. Bəyanatda bu hadisə nəticəsində yüzlərlə insanın öldürüldüyü, əsir götürüldüyü və yaralandığı bildirilir: “Bu soyqırım erməni millətçilərinin uzun illər apardığı etnik təmizləmə siyasətinin davamı olub. 1992-ci ilin əvvəlinə kimi onlarla kənd işğal edilib, yüzlərlə insan qətlə yetirilib. Bu hadisələrə dünya birliyinin diqqət yetirməməsi Xocalı soyqırımının da baş verməsinə gətirib çıxardı. Soyqırımdan sonra Ermənistanın Azərbaycana qarşı təcavüzünün genişlənməsi erməni işğalçılarının planlarının daha geniş olduğunu göstərib”.

İcmanın sədri Bayram Səfərov bildirib ki, “Dağlıq Qarabağın Azərbaycan İcması” İctimai Birliyi fəaliyyətə başladıqdan sonra qurum üçün müvafiq yer ayrılıb və normal şərait yaradılıb. O, ötən müddət ərzində icmanın bir sıra beynəlxalq təşkilatlara, xarici ölkələrin dövlət qurumlarına müraciətlər etdiyini söyləyib: “Bu gün qəbul etdiyimiz müraciətdə biz torpaqların işğaldan azad olunmasını istədiyimizi dilə gətirmişik”.

Xocalı şəhər İcra Hakimiyyətinin başçısı Şahmar Usubov isə bəyan edib ki, bu vaxta qədər dünyanın bir sıra ölkələrində Xocalı faciəsi ilə bağlı tədbirlər keçirilib və soyqırımın tanıdılması istiqamətində konkret addımlar atılıb. O, bu fəaliyyətin davam etdiriləcəyini vurğulayıb.

Mətbuat konfransında İdarə Heyətinin digər üzvləri – akademik Namiq Fərzəliyev, millət vəkili Rövşən Rzayev də öz fikirlərini bildiriblər.