Daxili siyasət

Ana səhifə

Daxili siyasət

Hüquq müdafiəçiləri və tarixçilər qondarma “erməni soyqırımı”nın ABŞ Konqresində müzakirəyə çıxarılması təşəbbüsünə etiraz edirlər

02 mart 2010 10:13 (UTC +04:00)

Bakı. Elnur Məmmədli-APA. ABŞ Konqresində qondarma “erməni soyqırımı”nın müzakirəyə çıxarılması təşəbbüsünə etiraz olaraq Azərbaycanın hüquq müdafiəçiləri, tarixçilər birgə dəyirmi masa təşkil ediblər. APA-nın məlumatına görə, tədbirdə çıxış edən tədqiqatçı Nəsiman Yaqublu bildirib ki, Xocalı soyqırımının ildönümündən dərhal sonra martın 4-də ABŞ Konqresində qondarma “erməni soyqırımı”nın müzakirəyə çıxarılması istəyi ikili standartlardan xəbər verir. Bəzi sənədləri nümayiş etdirən N. Yaqublu bildirib ki, ermənilər Qarabağa gəlmə olub və hətta SSRİ dövründə onların bu əraziyə köçməsinin 150 illiyi ilə əlaqədar Ağdərədə abidə də qoyulub. O xanlıqlar dövründə Qarabağda erməni kəndinin mövcud olmadığını da vurğulayıb: «Xalq Cümhuriyyəti dövründə Zəngəzurun ermənilərə verilməsi barədə iddialar da yanlışdır. Bunu tarixi xəritələr də sübut edir. Dağlıq Qarabağ erməni torpağı deyil, ermənilər gələrək burada soyqırımı törədiblər”. N. Yaqublu soyqırımının ermənilər tərəfindən törədilməsini isbatlamaq üçün kifayət qədər faktların mövcud olduğunu qeyd edib: «Biz soyqırımın tanıdılması metodologiyasını dəyişməliyik».

Hüquq mühafizəçisi Novella Cəfəroğlu isə bildirib ki, qondarma “erməni soyqırımı” ilə bağlı məsələni siyasi müstəvidən çıxarıb tarixçilərin ixtiyarına vermək lazımdır: «Biz məsələnin siyasi müstəviyə çıxarılmasına etiraz edirik. Əgər buna siyasi qiymət verirlərsə, Xocalı soyqırımı bu gün olub, qoy elə buna qiymət verilsin. Arxivlər açılmalıdır və məsələyə tarixi qiymət verilməlidir».

Milli Mənəvi Dəyərlərin Müdafiəsi İctimai Birliyinin sədri Jalə Cəfərova isə Xocalı hadisələrinin soyqırımı kimi tanınmasında təbliğatının aparılması üçün Avropa və dünyaya yayımlanan telekanalın olmasını vacib sayıb.

Tarixçi Almaz Məmmədova isə bildirib ki, Qərb bir tərəfdən inteqrasiyadan danışır, digər tərəfdən isə dövlətlər arasındakı münasibətləri gərginləşdirəcək addımlar atır. A. Məmmədova son vaxtlar İranın da Azərbaycana qarşı kampaniya apardığını deyib: «İran dövlətinin rəhbərliyi açıq bildirməlidir ki, islam dəyərlərinə hörmət edir ya yox. Əgər hörmət edirsə, o zaman Ermənistanla bu qədər isti münasibət qurmamalıdır».

Hüquq müdafiəçi Çingiz Qənizadə isə bildirib ki, qondarma “erməni soyqırımı”nın ABŞ Konqresində müzakirəsinin qarşısını ala biləcək bir şəxs var, o da bu ölkənin prezidenti Barak Obamadır. Ç. Qənizadə Obamaya müraciət etmək təklifini irəli sürüb.

Dəyirmi masa iştirakçıları qondarma “erməni soyqrımı” ilə bağlı məsələ Konqresdə müzakirə olunacağı halda bunun ABŞ-ın Azərbaycan və Türkiyə ilə münasibətlərinə mənfi təsir göstərəcəyini qeyd ediblər.