Daxili siyasət

Ana səhifə

Daxili siyasət

Milli Məclisin növbəti iclasında ombudsmanın seçilməsi məsələsinə baxılacaq

02 mart 2010 11:59 (UTC +04:00)

Bakı. Elbrus Seyfullayev - APA. Milli Məclisin növbəti iclası martın 5-də keçiriləcək. APA-nın xəbərinə görə, iclasın gündəliyinə 13 məsələnin müzakirəsi daxil edilib. Gündəlikdəki ilk məsələ Azərbaycanın insan hüquqları üzrə müvəkkilinin (Ombudsmanın) seçilməsi haqqındadır. Bundan başqa, gündəliyə Azərbaycanla Fransa arasında diplomatik pasportlara malik vətəndaşların qısamüddətli viza rejimindən qarşılıqlı azad olunması, Azərbaycanla Fransa arasında mədəniyyət mərkəzlərinin təsisi və fəaliyyət şərtləri haqqında sazişlərin təsdiqlənməsi haqqında qanun layihələri daxildir.
İclasda 2007-ci il yanvarın 1-də Avropa Birliyinə daxil olan Bolqarıstanın və Rumıniyanın yeni statusu ilə bağlı “Avropa-Qafqaz-Asiya dəhlizinin inkişafı üzrə beynəlxalq nəqliyyat haqqında” Əsas Çoxtərəfli Sazişə dəyişiklik və əlavələr edilməsi haqqında Protokolun təsdiq edilməsi, “Avropa-Qafqaz-Asiya dəhlizinin inkişafı üzrə beynəlxalq nəqliyyat haqqında” Əsas Çoxtərəfli Sazişə dair gömrük prosedurları və sənədlərin işlənməsi üzrə Texniki Əlavəyə əlavələr edilməsi haqqında Protokolun təsdiqinə də baxılacaq.
Deputatlar Beynəlxalq Dəniz Təşkilatı haqqında Konvensiyaya dəyişiklikləri, Bunker yanacağı ilə çirklənmə nəticəsində vurulan zərərə görə mülki məsuliyyət haqqında Beynəlxalq Konvensiyanın təsdiqini də müzakirə edəcəklər.
Yığıncaqda “Gömrük orqanlarında xidmət haqqında” Əsasnaməyə, “Azərbaycanın daxili işlər orqanlarında xidmət keçmə haqqında” Əsasnaməyə, “Feldyeger rabitəsi orqanında xidmət keçmə haqqında” Əsasnaməyə, “Miqrasiya orqanlarında qulluq keçmə haqqında” Əsasnaməyə və “Ədliyyə orqanlarında qulluq keçmə haqqında” qanuna, Silahlı Qüvvələrinin daxili xidmət Nizamnaməsinə, Meşə Məcəlləsinə dəyişikliklər müzakirə olunacaq. Bundan başqa, “Bədən tərbiyəsi və idman haqqında” qanununun tətbiqi ilə əlaqədar, eyni zamanda 2009-cu il 18 mart tarixli referendum nəticəsində qəbul edilən Konstitusiyasına əlavələr və dəyişikliklər edilməsi haqqında Referendum Aktının tətbiqi ilə əlaqədar bəzi qanunvericilik aktlarına dəyişikliklər və əlavələr ediləcək.
Gündəliyin son iki məsələsi isə “Cinayət yolu ilə əldə edilmiş pul vəsaitlərinin və ya digər əmlakın leqallaşdırılmasına və terrorçuluğun maliyyələşdirilməsinə qarşı mübarizənin gücləndirilməsi məqsədilə bəzi qanunvericilik aktlarına dəyişikliklər və əlavələr edilməsi” və “Məhkəmələrin fəaliyyəti haqqında informasiya əldə etmək barədə” qanun layihələridir.

milli_məclis