Daxili siyasət

Ana səhifə

Daxili siyasət

Milli Məclis “Məhkəmələrin fəaliyyəti haqqında informasiya əldə etmək barədə” qanun layihəsini ikinci oxunuşda qəbul edib

05 mart 2010 15:20 (UTC +04:00)

Bakı. Elbrus Seyfullayev-APA. Milli Məclis “Məhkəmələrin fəaliyyəti haqqında informasiya əldə etmək barədə” qanun layihəsini ikinci oxunuşda qəbul edib. APA-nın xəbərinə görə, sənəd haqqında Milli Məclisin Hüquq siyasəti və dövlət quruculuğu komitəsinin sədri Əli Hüseynov məlumat verib. Komitə sədri deyib ki, bu qanun layihəsinin mahiyyəti məhkəmələrin fəaliyyəti haqda ictimaiyyətin məlumatlandırılmasından ibarətdir. O bildirib ki, qanunun qəbulunu hüquq-mühafizə orqanları sahəsində islahat kimi qiymətləndirmək lazımdır.

İclasda həmçinin Azərbaycanla Fransa arasında diplomatik pasportlara malik vətəndaşların qısamüddətli viza rejimindən qarşılıqlı azad olunması, Azərbaycanla Fransa arasında mədəniyyət mərkəzlərinin təsis və fəaliyyət şərtləri haqqında sazişlərin təsdiqlənməsi haqqında qanun layihələri də təsdiqlənib.

Millət vəkilləri 2007-ci il yanvarın 1-də Avropa Birliyinə daxil olan Bolqarıstanın və Rumıniyanın yeni statusu ilə bağlı “Avropa-Qafqaz-Asiya dəhlizinin inkişafı üzrə beynəlxalq nəqliyyat haqqında” Əsas Çoxtərəfli Sazişə dəyişiklik və əlavələr edilməsi haqqında Protokolun təsdiq edilməsi, “Avropa-Qafqaz-Asiya dəhlizinin inkişafı üzrə beynəlxalq nəqliyyat haqqında” Əsas Çoxtərəfli Sazişə dair gömrük prosedurları və sənədlərin işlənməsi üzrə Texniki Əlavəyə əlavələr edilməsi haqqında Protokolu da qəbul ediblər. Bundan başqa, Beynəlxalq Dəniz Təşkilatı haqqında Konvensiyaya dəyişikliklər, Bunker yanacağı ilə çirklənmə nəticəsində vurulan zərərə görə mülki məsuliyyət haqqında Beynəlxalq Konvensiya, o cümlədən “Gömrük orqanlarında xidmət haqqında” Əsasnaməyə, “Azərbaycanın daxili işlər orqanlarında xidmət keçmə haqqında” Əsasnaməyə, “Feldyeger rabitəsi orqanında xidmət keçmə haqqında” Əsasnaməyə, “Miqrasiya orqanlarında qulluq keçmə haqqında” Əsasnaməyə və “Ədliyyə orqanlarında qulluq keçmə haqqında” qanuna, Silahlı Qüvvələrinin daxili xidmət Nizamnaməsinə, Meşə Məcəlləsinə dəyişikliklər müzakirə olunaraq qəbul edilib.

Sonda “Bədən tərbiyəsi və idman haqqında” qanun, eyni zamanda 2009-cu il 18 mart tarixli referendum nəticəsində qəbul edilən Konstitusiyasına əlavələr və dəyişikliklər edilməsi haqqında Referendum Aktının tətbiqi ilə əlaqədar bəzi qanunvericilik aktlarına dəyişikliklər və əlavələrə də münasibət bildiriblər.

“Cinayət yolu ilə əldə edilmiş pul vəsaitlərinin və ya digər əmlakın leqallaşdırılmasına və terrorçuluğun maliyyələşdirilməsinə qarşı mübarizənin gücləndirilməsi məqsədilə bəzi qanunvericilik aktlarına dəyişikliklər və əlavələr edilməsi də təsdiqlənib.