Daxili siyasət

Ana səhifə

Daxili siyasət

Azərbaycan Prezidenti: ”Dövlət strukturları yersiz yoxlamaları dayandırmalıdırlar”

12 mart 2010 23:52 (UTC +04:00)

Dövlət büdcəsi təbii ki, qəbul ediləndə proqramda nəzərdə tutulmuş məsələlərin həlli üçün maliyyə mənbələrinin təşkil edilməsi də nəzərdə tutulub, yəni maliyyə problemləri olmayacaq. Azərbaycan büdcəsi, bu ilə nəzərdə tutulmuş xərclər, deyə bilərəm ki, çox konservativ şəkildə təmin edilib. Bizim hələ böyük ehtiyatımız var. Ona görə də nəzərdə tutulmuş problemlərin həlli üçün maliyyə mənbələri var və maliyyə vaxtında açılacaq”. APA-nın “Azərtac”a istinadən verdiyi xəbərə görə, bunu Azərbaycan Prezidenti İlham Əliyev “Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı”nın icrasının birinci ilinin yekunlarına həsr olunmuş konfransdakı yekun nitqində deyib.

Son illər Azərbaycana çoxsaylı xarici istehsallı texnika gətirildiyini deyən Prezident yerli istehsalın gücləndirilməsi sayəsində artıq texnikanın bir hissəsinin Azərbaycanda istehsal edildiyini vurğulayıb: “Azərbaycanda rəqabət qabiliyyətli müəssisələr işə salınır. Onlar həm daxili tələbatı ödəyir, eyni zamanda, ölkəmizin ixrac potensialı da genişlənir”.

Bu il Sahibkarlığa Kömək Milli Fondunun xətti ilə güzəştli kreditlərin nəzərdə tutulduğunu deyən ölkə başçısı Azərbaycan Dövlət İnvestisiya Şirkətinin xətti ilə ölkənin inkişafı üçün vacib olan layihələrin icra edildiyini bildirib.

“Biz çalışmalıyıq ki, daxili istehsalı gücləndirmək üçün bütün imkanlardan istifadə edək”- deyən Prezident 2010-cu ildə həm ölkənin, həm sahibkarlığın inkişafı üçün böyük infrastruktur layihələrinin davam etdiriləcəyini bildirib.

“Bugünkü Azərbaycanda elektrik enerjisi ilə təminat 100 faiz nəzərdə tutulub. Qazlaşdırma prosesi də uğurla gedir. Artıq qazlaşdırma 85 faiz təşkil edilib və xüsusilə indi rayon mərkəzlərindən kənarda yerləşən məntəqələrin qazlaşdırılması işi gedir” deyən ölkə başçısı içməli su, kanalizasiya və suvarma məsələləri ilə bağlı konkret proqramların icra edilməyə başladığını da qeyd edib.

Prezident bildirib ki, Azərbaycanda sosial infrastrukturun yaradılması davam etdiriləcək. Bu il Azərbaycanda “Ekologiya ili” elan edildiyini xatırladan ölkə başçısı xüsusilə Bakı və Abşeron yarımadasında ekoloji vəziyyətin qısa müddətdə yaxşılaşdırılmasının zəruri olduğunu söyləyib.

“Sahibkarlara bundan sonra da dəstək, həm də siyasi dəstək göstəriləcək. Yerli icra orqanları sahibkarlara kömək etməli, onların işinə qarışmamalıdırlar. Dövlət strukturları yersiz yoxlamaları dayandırmalıdırlar. Buna ehtiyac yoxdur. Artıq Azərbaycanda iqtisadi islahatlar sahəsində böyük işlər görülüb. Biz şəffaflığa nail ola bilmişik. Şəffaflıq bizim üçün, iqtisadi inkişaf üçün, ümumiyyətlə, ölkəmizin inkişafı üçün çox mühüm əhəmiyyət daşıyır. Enerji sahəsində şəffaflıq təşəbbüsünün icrası sahəsində Azərbaycan bir nömrəli ölkədir. Bunu bütün dünya bilir, qəbul edir və görür.
Bir sözlə, artıq bizdə müxtəlif yerlərdə “Bir pəncərə” sistemi tətbiq olunur. Sahibkarların fəaliyyətini yüngülləşdirmək, əsassız tələblərin qarşısının alınması üçün bu, çox vacib məsələdir. Biz müasir uçot sisteminə keçirik. Yəni bütün sahələrdə olduğu kimi, bu sahədə də müasirləşmə gedir, ən qabaqcıl meyarlar, texnologiyalar və təcrübə tətbiq olunur” deyən ölkə başçısı “belə olan hallarda yersiz müdaxilələr, yoxlamalar əsassızdır, buna son qoyulmalıdır. Əlbəttə ki, sahibkarlar dövlət və xalq qarşısında öz vəzifə borclarını şərəflə yerinə yetirməlidirlər, vergiləri vaxtında ödəməlidirlər” deyə, vurğulayıb.

Sahibkarları sosial təşəbbüslərə daha fəal qoşulmağa çağıran Prezident Azərbaycanda çox böyük, regional, yəni transmilli mahiyyət daşıyan şirkətlərin olduğunu, onların sosial məsələlərin həllində də iştirakının həm iş adamları üçün mənəvi qida verəcəyini, həm də ölkənin inkişafına dəstək ola biləcəyini qeyd edib: “Bu proseslər gedir və xüsusilə bölgələrdə sahibkarlar öz maliyyə resurslarını məktəblərin tikintisi sahəsində işə salırlar. Mən istərdim ki, bu işlər başqa sahələrdə də, əlbəttə ki, imkan daxilində görülsün. Bu işlər, əlbəttə ki, məcburi xarakter daşıya bilməz. Ancaq mən hesab edirəm ki, imkanlı firmalar, şirkətlər, iş adamları ağır vəziyyətdə yaşayanlara əl uzatsalar yaxşı olar”.

”Biznesin inkişafı üçün süni maneələr aradan qaldırılmalı, əsassız yoxlamalar dayandırılmalıdır” deyən Prezident yerli icra orqanlarını sahibkarlara kömək göstərməyə çağırıb.

İlham Əliyev bildirib ki, 2009-cu il sahibkarlar üçün ağır il olub: “Azərbaycan dövləti və vətəndaşları, demək olar ki, vətəndaşlarımızın mütləq əksəriyyəti bu böhrandan əziyyət çəkmədilər. Çünki inflyasiya cəmi 1,5 faiz oldu. Əhalinin pul gəlirləri 10 faizdən çox artıb, sosial ödəmələr tam şəkildə təmin edilib, maaşlarda, pensiyalarda heç bir yubanma olmayıb. Ancaq sahibkarlar bu böhrandan əziyyət çəkdilər. Bu həqiqətdir və Azərbaycan dövləti onlara - sahibkarlara daha da böyük həcmdə yardım göstərməlidir. Biz həm maliyyə yardımı, kreditlərin verilməsi, həm də ki, sahibkarlığın inkişafı üçün daha da yaxşı şəraitin yaradılması sahəsində düşünməliyik, kömək eləyək ki, yerli iş adamlarımız çətin, böhranlı vəziyyətdən tezliklə çıxa bilsinlər”.

Kənd təsərrüfatının inkişafı üçün nəzərdə tutulmuş bütün subsidiyaların, kreditlərin veriləcəyini söyləyən ölkə başçısı ümumi daxili məhsulun 85 faizinin özəl sektorda formalaşdığını deyib.

”Bu yaxınlarda mənə verilən arayışda göstərilir ki, biz demək olar ki, əsas ərzaq məhsulları ilə özümüzü böyük dərəcədə təmin edirik. Mən bəzi rəqəmləri indi səsləndirmək istəyirəm ki, bunu hamı bilsin. Özümüzü dənli bitkilər üzrə 76 faiz təmin edirik. Quş əti 74 faiz, ət 94 faiz, kərə yağı 83 faiz, süd məhsulları və süd 85 faiz, un 94 faiz, şəkər 150 faiz, yəni ki, 50 faizi ixraca gedir, tərəvəz 102 faiz, meyvə 127 faiz - budur əsas qida məhsullarının statistikası. Azərbaycanda heç vaxt özünü bu dərəcədə təmin etmək imkanları olmayıb”-deyə Prezident bildirib.

Ölkə başçısı onu da bildirib ki, təkcə daxili bazarın təmin edilməsi ilə yox, həm də yerli sahibkarlara xaricə çıxmaq üçün əlavə şərait yaradılmalıdır: “Yerli sahibkarların o bazarlara çıxması, investisiya imkanlarının araşdırılması və yerli sahibkarlar üçün xaricdə münbit şəraitin yaradılması işində İqtisadi İnkişaf Nazirliyi, Xarici İşlər Nazirliyi birlikdə çalışmalıdırlar. Yəqin ki, müəyyən müddətdən sonra təkliflər paketini hazırlamalıdırlar, biz orada görəcəyik ki, hansı ölkədə hansı sahə üzrə Azərbaycanın hansı şirkəti öz biznes imkanlarını genişləndirə bilər. Sahibkarlar da öz tərəfindən İqtisadi İnkişaf Nazirliyinə sifarişlərini versinlər, onlar üçün hansı ölkədə işləmək daha da maraqlıdır, əlverişlidir, məqbuldur ki, Azərbaycan dövləti bu işləri qursun. Bizim demək olar ki, bütün ölkələrlə münasibətlərimiz müsbətdir, yaxşıdır. Azərbaycanın dünyadakı imici də çox müsbətdir. Bizimlə əməkdaşlıq etmək istəyən ölkələrin, dostlarımızın sayı artır. Mən şübhə etmirəm ki, Azərbaycan şirkətlərini xaricdə böyük maraqla qarşılayacaqlar, xüsusilə, əgər görsələr ki, Azərbaycan dövləti bu işlərdə israrlıdır və öz şirkətlərinə dəstək verir. Bu istiqamət bizim üçün yenilikdir. Bu vaxta qədər biz bu barədə düşünmürdük. Çünki imkanlarımız yox idi. Bu gün biz artıq keyfiyyətli, dünya standartlarına uyğun məhsulun buraxılmasına nail olmuşuq. Gələcək illərdə bu gün görülən işlər ona gətirib çıxaracaq ki, Azərbaycanda ən keyfiyyətli məhsullar istehsal olunacaq. Biz indidən özümüzü bu işlərə hazırlamalıyıq”.

Prezident deyib ki, bu gün yaranmaqda olan nəhəng sənaye kompleksləri 2-3 ilə işə başlayacaq: “Azərbaycanın iqtisadi müstəqilliyi daha da möhkəmlənəcək. Bunun nəticəsi olaraq ölkəmizin müstəqil siyasət aparmaq imkanları daha da genişlənəcəkdir. Bilirəm ki, bəzi xarici dairələrin xoşuna gəlmir ki, Azərbaycan sərf etməyən təşəbbüslərə qoşulmur, çirkli oyunlara qoşulmur, öz xalqının mənafeyini hər şeydən üstün tutur, öz xalqının milli maraqlarını heç kimə güzəştə getmir. Bilirəm ki, bəzi xarici dairələr bundan o qədər də razı deyillər. Amma bu bizim problemimiz deyil. Bizim problemimiz öz milli maraqlarımızı müdafiə etmək, Azərbaycan xalqının təhlükəsizliyini, sosial rifahını təmin etmək, ölkəmizi uğurla inkişaf etdirmək, gücləndirmək, müstəqilliyimizi əbədi, dönməz etmək, bölgədə imkanlarımızı genişləndirməkdir”.