Daxili siyasət

Ana səhifə

Daxili siyasət

Dövlət komissiyası itkin düşmüş şəxslərin axtarışı ilə əlaqədar beynəlxalq təşkilatlara 576 nəfər barəsində sorğu göndərib

13 mart 2010 13:01 (UTC +04:00)

APA-nın məlumatına görə, bu barədə Azərbaycan hökumətinin dövlət təhlükəsizliyi barədə Milli Məclisə təqdim etdiyi hesabatda bildirilir.

Hesabatda qeyd olunur ki, Əsir və itkin düşmüş, girov götürülmüş vətəndaşlarla əlaqədar Dövlət Komissiyasında itkin düşmüş şəxs kimi qeydiyyata alınmış, lakin Beynəlxalq Qızıl Xaç Komitəsində qeydiyyatdan keçməyən 117 Azərbaycan vətəndaşı ilə bağlı materiallar bu quruma göndərilib.

Aparılan araşdırmalar nəticəsində il ərzində itkin kimi qeydiyyatdan keçən 84 nəfərin taleyinə aydınlıq gətirilib, onlardan 29 nəfərin sağ olması, 35 nəfərin döyüşlərdə həlak olması və yaxınları tərəfindən tanınaraq dəfn edilməsi, 13 nəfərin adının siyahıda təkrar keçməsi, 7 nəfərin isə münaqişə bölgəsindən kənarda itkin düşməsi müəyyənləşdirilib. Həmçinin daha 7 nəfərin döyüşlərin gedişində itkin düşməsi müəyyənləşdirilərək, adları müvafiq siyahıya salınıb.

2009-cu ilin sonuna olan məlumata görə, Azərbaycanda 4133 nəfər itkin düşüb, 1396 nəfər əsir və girovluqdan azad olunan şəxs kimi Dövlət Komissiyasında qeydiyyatdan keçib.

Dövlət Komissiyasında olan məlumatların dəqiqləşdirilməsi və itkin düşmüş şəxslərin axtarışı ilə əlaqədar müxtəlif dövlət orqanlarına və beynəlxalq təşkilatlara 576 nəfər barədə sorğular göndərilib. Bu kateqoriyadan olan 983 nəfərin “şəxsi işi” tərtib edilib.