Daxili siyasət

Ana səhifə

Daxili siyasət

Azərbaycan QHT-ləri ABŞ və Avropa ölkələrində qondarma “erməni soyqırımı”nın tanınması prosesini pisləyən bəyanat qəbul ediblər

16 mart 2010 12:44 (UTC +04:00)

Bakı. Elnur Məmmədli – APA. Azərbaycanda fəaliyyət göstərən bir qrup ictimai birlik ABŞ və Avropa ölkələrində qondarma “erməni soyqırımı”nın tanınması və Türkiyə ilə Azərbaycana qarşı olan təzyiqlərlə bağlı birgə mətbuat konfransı keçiriblər. APA-nın məlumatına görə, tədbirdə çıxış edən Türkiyə Universitetləri Məzunları İctimai Birliyinin sədri Çingiz Bayramov çıxış edərək bildirib ki, Qərb ölkələrində Azərbaycan və Türkiyəyə ikili standartlarla yanaşılır və bunun nəticəsidir ki, zaman-zaman uydurma “erməni soyqırımı” məsələsi gündəmə gətirilir: “Heç bir dəlil olmadan bu ABŞ Konqresinin komitəsi bununla bağlı qətnamə qəbul edir, bu ədalətsizliyin açıq göstəricisidir”. Ç. Bayramov mətbuat konfransının ilkin etiraz tədbiri olduğunu qeyd edib.

Qarabağ Müharibəsi Əlilləri, Veteranları və Şəhid Ailələri ictimai Birliyinin sədri Mehdi Mehdiyev qərbdə başlayan antitürk prosesinin ABŞ-dan idarə olunduğunu qeyd edib. ATƏT-in Minsk qrupunun fəaliyyətini tənqid edən M. Mehdiyevin sözlərinə görə həmsədrlər açıq şəkildə Ermənistanı müdafiə edirlər.

Çernobıl Əlilləri İttifaqının sədri Mirhəsən Həsənov, Azərbaycan Vətən Müharibəsi Veteranları Birliyinin sədri Füzuli Rzaquliyev, Gözdən Əlillər Cəmiyyətinin sədri Səmyar Abdullayev və digərləri mövzu ilə bağlı çıxış ediblər.

Mətbuat konfransının sonunda təşkilatların birgə bəyanatı qəbul edilib. Bəyanatda ATƏT-in Minsk qrupunun üzvü olan dövlətlərin obyektiv və ədalətsiz mövqe tutduğu bildirilir, bunun bölgədə sülh aratmağa xidmət etmədiyi vurğulanır. Bəyanata imza atan təşkilatlar qondarma erməni soyqırımı ilə bağlı müzakirələrin aparılmasına, qərb dövlətlərində bununla bağlı sənədlərin qəbul olunmasına etiraz etdiklərini bildiriblər. Bəyanatı 12 təşkilat imzalayıb.