Daxili siyasət

Ana səhifə

Daxili siyasət

“Ermənilərin törətdiyi soyqırım qurbanı – Bağanis Ayrım” kitabının təqdimatı keçirilib

24 mart 2010 10:54 (UTC +04:00)

Bakı. Elnur Məmmədli – APA. “Ermənilərin törətdiyi soyqırım qurbanı – Bağanis Ayrım” kitabının təqdimat mərasimi keçirilib. APA-nın məlumatına görə, Azərbaycan Atatürk Mərkəzində keçirilən mərasimdə ictimaiyyət nümayəndələri, millət vəkilləri, media rəhbərləri və Bağanis Ayrım faciəsinin şahidləri iştirak edib.

Azərbaycan Atatürk Mərkəzinin rəhbəri, millət vəkili Nizami Cəfərov çıxış edərək ermənilərin azərbaycanlılara qarşı törətdiyi soyqırımlardan danışıb, bu cinayətlərin böyük tarixi olduğunu və məqsədli siyasət nəticəsində həyata keçirildiyini vurğulayıb. Kitabın müəlliflərindən biri, millət vəkili Qənirə Paşayeva isə bildirib ki, Qarabağda ermənilərin törətdiyi faciələr, Dağlıq Qarabağın və ətraf ərazilərin işğalı ilə yanaşı, Qazax rayonunun 7 kəndinin Ermənistanın işğalı altında olması faktı da qabardılmalıdır. Q. Paşayeva bu faktın dünya ictimaiyyətinin diqqətinə çatdırılmasının vacib olduğunu söyləyib: “Bağanis Ayrım da Ermənistan ordusu tərəfindən işğal edilib və orada soyqırım törədilib. Biz istədik ki, bu kitab vasitəsilə bu soyqırımı dünyaya çatdıraq. Bu kənddə insanlar diri-diri yandırılıb, qadınlara, uşaqlara aman verilməyib. Burada təkcə silahlılar deyil, ermənilərin sadə insanları və qadınlar da iştirak edib”.

Kitabın digər müəllifi, “Şərq” qəzetinin baş redaktoru Akif Aşırlı kitabda faktlardan istifadə edildiyini deyib. Onun sözlərinə görə, kitabın hazırlanmasına Bağanis Ayrım kəndinin sakinləri ilə bərabər prokurorluq orqanları da yardım edib.

Milli Elmlər Akademiyasının Tarix İnstitutunun direktoru Yaqub Mahmudov bəyan edib ki, Azərbaycanda vətənpərvərlik əhval-ruhiyyəsi güclənməli və ermənilərin kimliyi ilə bağlı məlumatlar verilməlidir: “Ermənilərin vəhşiliyini dünyaya çatdırmaq lazımdır”.

Mərasimdə çıxış edən digər şəxslər, faciənin şahidləri də kitab və ermənilərin qəddarlığı haqqında fikirlərini bildiriblər.

dağlıq_qarabağ