Daxili siyasət

Ana səhifə

Daxili siyasət

İqbal Ağazadə: “Birgə blokun yaradılması məsələsində bizimlə bağlı kimsə problemli mövqe ifadə edə bilməz”

29 mart 2010 10:29 (UTC +04:00)

Bakı. Elnur Məmmədli – APA. “Ümid Partiyası hansısa bloka qoşulmaq barədə müzakirə aparmır. Biz yalnız həmtəsisçi olacağımız blokda iştirak edəcəyik”. Bunu APA-ya açıqlamasında Ümid Partiyasının sədri İqbal Ağazadə deyib. “Azadlıq” blokuna daxil olan partiyalar, Demokrat və Ümid partiyalarının birgə seçki bloku yaradacağı ilə bağlı aparılan müzakirələrə münasibət bildirən İ. Ağazadə müxalifətin vahid cəbhədə seçkilərə qatılmağın tərəfdarı olduqlarını söyləyib: “Bundan kənarda partiyanın maraqları təmin olunmayacağı halda biz seçkilərə ayrıca qatılacağıq. Həmin partiyaların özü daha geniş koalisiyanın yaranmasında maraqlı olmalıdır”. Tərəflər arasında müəyyən müzakirələrin aparıldığını deyən İ. Ağazadənin sözlərinə görə, buna fərqli yanaşmalar sərgiləyən də olub, Ümid Partiyasının blokda olmasını istəyənlər də: “Biz birgə blokun yaradılmasını mümkün sayırıq. Bizim üçün problem yoxdur və bizimlə bağlı da kimsə problemli mövqe ifadə edə bilməz. Çünki Ümid Partiyası ardıcıl siyasi xətti və mövqeyi olan bir təşkilatdır. Bu, baş tutacaqsa, cəmiyyət üçün də, həmin partiyalar üçün də xeyirli olacaq”.

“Azadlıq” blokunun üzvü, Vətəndaş və İnkişaf Partiyasının sədri Əli Əliyev isə APA-ya bildirib ki, aparılan müzakirələrdə hələ konkret olaraq partiyalar məsələsinə baxılmayıb, yalnız prinsiplər müzakirə edilib və yaranacaq seçki bloku ilə bağlı müəyyən qənaət var: “Ümid Partiyası ilə rəsmi müzakirələr aparılmayıb, yalnız şəxsi təmaslar olub. ADP ilə məsləhətləşmə aparılıb və müəyyən konfiqurasiyalar var. Burada da blokda hansı partiyaların olmasından əvvəl prinsiplər müzakirə edilib. Hakimiyyətə qarşı mövqe, seçkilərin demokratik keçirilməsi ilə bağlı atılacaq addımlar əsas prinsiplər kimi götürülür”. Ə. Əliyev bildirib ki, hazırda danışıqlar dayandırılıb və yaxın günlərdə yenidən başlayacaq: “İrəliləyişə nail olmaq lazımdır ki, konkret partiyalarla danışıqlar aparılsın”.

Qeyd edək ki, Azərbaycan Xalq Cəbhəsi Partiyasının Ali Məclisinin sədri Həsən Kərimov “Azadlıq” siyasi blokuna daxil olan partiyalar və ADP-nin birgə seçki bloku yaratması barədə müzakirələrin aparıldığını deyib. O, blokda Ümid Partiyasının da təmsil olunacağı ilə bağlı məlumatların yalan olduğunu, bu partiya ilə heç bir müzakirənin aparılmadığını qeyd edib.