Daxili siyasət

Ana səhifə

Daxili siyasət

Millət vəkili Gülər Əhmədova 31 Mart - Azərbaycanlıların Soyqırımı Günü ilə bağlı mətbuat konfransı keçirib

31 mart 2010 09:59 (UTC +04:00)

Bakı. Elnur Məmmədli-APA. Millət vəkili Gülər Əhmədova 31 Mart - Azərbaycanlıların Soyqırımı Günü ilə bağlı mətbuat konfransı keçirib. APA-nın məlumatına görə, millət vəkili bildirib ki, azərbaycanlıların soyqırımı ilə bağlı dünyanın bir sıra ölkələrində Beynəlxalq Diaspora Mərkəzi (BDM) ilə birgə tədbirlər keçirilib. Gülər Əhmədovanın sözlərinə görə, Xocalı soyqırımının ildönümü ərəfəsində Belarus və Çexiyada bir sıra tədbirlər həyata keçirilib və hər iki ölkənin alimləri ilə əməkdaşlıq imkanları yaranıb: “Bu alimlərlə iş davam edəcək, soyqırımı ilə bağlı kitabların hazırlanması, həmçinin elmi-praktik konfransın keçirilməsi nəzərdə tutulur”. Onun sözlərinə görə həyata keçirilən tədbirlər nəticəsində Çexiya və Belarus alimləri də Xocalı faciəsinin soyqırımı olduğunu bildirib və bunu vəhşilik adlandırıblar.

Sonuncu dəfə isə Çanaqqalada tədbirlər keçirildiyini deyən millət vəkili bildirib ki, Çanaqqala savaşında şəhid olmuş insanlarla bağlı hazırlanmış xatirə lövhələrində digər xalqların adı olsa da, azərbaycanlıların adı yoxdur: “Biz istədik ki, bununla bağlı Türkiyədə iş başlasın və bir il öncə bununla bağlı Beynəlxalq Diaspora Mərkəzi ilə birgə Türkiyə dövlətinin rəhbərliyinə müraciət edildi. Nəticədə Türkiyə rəhbərliyi orada azərbaycanlı şəhidlərin adı olan xatirə lövhəsi qoyulması barədə qərar verib. 90 il sonra xatirə lövhəsinin qoyulması birmənalı qarşılanmır, amma Azərbaycanı sevən insanlar bunu doğru qiymətləndirdi. Amma erməni mətbuatı bundan narahat oldu və bunu gözdən salmağa çalışdılar. Azərbaycan mətbuatında da ermənilərin dəyirmanına su tökənlər tapıldı. Buna təəssüf edirəm və həmin şəxslərin xırda hisslərlə yaşadığını düşünürəm. Türkiyə ilə bağlı görməli işlərimiz çoxdur, Azərbaycanda hər kəs Türkiyəni yaxşı tanısa da, Türkiyədə hamı Azərbaycanı yaxşı tanımır. Ona görə də bu işi davam etdirtməliyik”.

G. Əhmədova onu da bildirib ki, bəzən Azərbaycan diasporunun nümayəndələri təkbaşına iş görmək istəyir: “Amma onlar öz ambisiyalarını kənara qoymalıdır”.