Daxili siyasət

Ana səhifə

Daxili siyasət

AXCP sədrinin müavini: “Ümid Partiyası ilə əməkdaşlığın əleyhinəyik”

31 mart 2010 14:41 (UTC +04:00)

Bakı. Elnur Məmmədli – APA. “Ümid Partiyası ilə AXCP-nin bloklaşması, müttəfiqliyi barədə deyilənlər bir qədər şişirdilmiş məsələdir. Bizim ümumiyyətlə, bu partiya ilə koalisiya qurmaq barədə məsləhətləşməmiz olmayıb və bu fikirlərin əsası yoxdur”. Bunu APA-ya açıqlamasında Azərbaycan Xalq Cəbhəsi Partiyasının (AXCP) sədr müavini Nurəddin Məmmədli deyib. Onun sözlərinə görə, müəyyən partiyalarla əməkdaşlıqla bağlı AXCP Rəyasət Heyətində müzakirə aparılıb və qərar qəbul edilib: “İndiki mövqe ondan ibarətdir ki, bizim əməkdaşlıq edə biləcəyimiz partiyalar var, amma bu sırada Ümid Partiyası yoxdur. Bu, partiyanın qərardır və buna hörmətlə yanaşmaq lazımdır. Burada çoxlu arqument var, amma hələlik müxalifətin ümumi işbirliyi ilə bağlı müzakirələrin getdiyi bir vaxtda detallara varmaq istəyindən uzağıq. Bu proses başa çatdıqdan sonra biz hər bir partiya ilə bağlı münasibətimizi ictimaiyyətə çatdıracağıq”.

N. Məmmədli bildirib ki, onlar indiki halda ADP ilə əməkdaşlığın tərəfdarıdırlar: “Ümid Partiyası ilə əməkdaşlığın isə əleyhinəyik”.

Ümid Partiyasının sədri İqbal Ağazadə isə APA-ya bildirib ki, onlar AXCP ilə əməkdaşlıqla bağlı bu quruma heç bir müraciət etməyiblər. “Azadlıq” blokunda təmsil olunan Vətəndaş və İnkişaf Partiyasının (VİP) sədri Əli Əliyevlə keçirilən görüş və aparılan danışıqlara gəldikdə, İ. Ağazadə bildirib ki, bu görüşün AXCP-yə aidiyyəti yoxdur: “Əli Əliyev bəyəm AXCP-nin sözçüsüdür? Onunla mənim aramda nə olub, bunu Əli Əliyevlə mən bilirəm”.

Ümid Partiyası ilə birgə seçki bloku yaratmaq təklifinə ALP, VİP və ADP rəhbərlərinin razı olması barədə yayılan məlumatlara gəldikdə, İ. Ağazadə deyib ki, o, müxalifətin birliyinin yaranmasında Ümid Partiyasının cəmiyyətdəki yeri və rolunu nəzərə alaraq belə bir mövqenin nümayiş etdirilməsini müsbət qiymətləndirir: “Bu obyektiv mövqeyə görə Lalə Şövkətə, Əli Əliyevə və Sərdar Cəlaloğluna təşəkkürümü bildirirəm. Biz nə AXCP, nə də Müsavatla danışıq aparmışıq. Qoy sabah Müsavat da deməsin ki, biz Ümid Partiyası ilə əməkdaşlıq etmək fikrində deyilik. Hələ bir sual versinlər ki, Ümid onlarla əməkdaşlıq edirmi?” İ. Ağazadə bildirib ki, hazırda müxalifətin birliyi barədə bəzi partiyalarla müzakirələr aparılır, amma bu barədə zamanı çatanda açıqlama veriləcək.