Daxili siyasət

Ana səhifə

Daxili siyasət

2008-ci il prezident seçkilərini izləmiş ATƏT DTİHB Seçki Müşahidə Missiyasının tövsiyələrinin yerinə yetirilməsinə həsr olunmuş dəyirmi masa keçirilib

08 aprel 2010 08:36 (UTC +04:00)

Bakı. Viktoriya Dementyeva-APA. ATƏT-in Bakı ofisi siyasi partiya və vətəndaş cəmiyyəti təmsilçilərin iştirakı ilə 2008-ci il prezident seçkilərini izləmiş ATƏT-in Demokratik Təsisatlar və İnsan Hüquqları Bürosunun (DTİHB) Seçki Müşahidə Missiyasının tövsiyələrinin yerinə yetirilməsinə həsr olunmuş dəyirmi masa keçirilib. APA-nın məlumatına görə, dəyirmi masada müzakirələrin əsas məqsədi seçki prosesinə inamı artırmaq və müxtəlif siyasi partiyalar arasında qarşılıqlı münasibətləri təşviq etmək olub. Tədbirin gündəliyində “Sərbəst toplaşmaq azadlığı haqqında” qanun və seçki prosesinə qanunsuz müdaxilə də daxil olmaqla, seçki kampaniyasına dair məsəllər var.

Tədbiri açılış mərasimində çıxış edən ATƏT-in Bakıdakı Ofisinin rəhbəri Əli Bilge Cankorel bildirib ki, seçki prosesinin təkmilləşdirilməsi və seçkilərin ölkənin ATƏT qarşısında götürdüyü öhdəliklərə və demokratik seçkilərə dair beynəlxalq standartlara uyğun keçirilməsi istiqamətində görülən işlərdə ATƏT-in Bakı ofisi hakimiyyət, siyasi partiyalar və vətəndaş cəmiyyətinə kömək etməyə hazırdır: “Azərbaycanın əvvəlki seçkilərdə nail olduğu irəliləyişləri və seçki mühitində hələ də mövcud olan problemləri nəzərə alaraq, biz 2010-cu ildə əsas diqqəti siyasi plüralizm, seçki administrasiyası və fundamental hüquq və azadlıqlar kimi sahələrə yönəltmək niyyətindəyik”.

Dəyirmi masada çıxış edən ATƏT DTİHB-in direktorunun birinci müavini Duqlas Veyk Azərbaycanda 2008-ci il prezident seçkilərində qeydə alınmış əhəmiyyətli tərəqqini alqışlayıb: “Bununla belə bir sıra sahələrdə hələ görüləsi işlər qalıb, bu xüsusilə kütləvi informasiya vasitələrinə çıxış əldə etmək imkanı, seçki prosesinin proropsional şəkildə işıqlandırılması daxildir. Azərbaycan tərəfinin dəvətindən sonra ATƏT qarşıdan gələn parlament seçkilərinin təşkilinə yardım göstərməyə və seçkiqabağı situasiyanı dəyərləndirmək üçün qiymətləndirmə missiyası göndərməyə hazırdır”

Tədbirdə 16 siyasi partiya, vətəndaş cəmiyyəti, beynəlxalq ictimaiyyət nümayəndələri, Azərbaycanda akkreditə olunmuş diplomatik missiyaların nümayəndələri iştirak ediblər.
Qeyd edək ki, ATƏT-in Bakı ofisi yaxın vaxtlarda bu istiqamətdə daha iki dəyirmi masa keçirəcək. Seçki administrasiyası, xüsusilə də seçki komissiyalarının tərkibi və onların rəhbərliyi, namizədlərin qeydiyyatı, seçki şikayətlərinin baxılması və medianın seçkilərdə rolu həmin tədbirlərin əsas müzakirə mövzuları olacaq.