Daxili siyasət

Ana səhifə

Daxili siyasət

Arif Hacılı: “Azərbaycan siyasətində Rəsul Quliyevlik iş yoxdur”

08 aprel 2010 13:11 (UTC +04:00)

Bakı. Elnur Məmmədli - APA. “Ölkədəki problemlərin həlli ilə bağlı hakimiyyətlə müxalifət arasında hər hansı müzakirəyə ehtiyac yoxdur. Əgər hər hansı sahədə problem varsa, hakimiyyət bunu özü həll edir”. Bunu APA-ya açıqlamasında Yeni Azərbaycan Partiyası (YAP) icra katibinin müavini Mübariz Qurbanlı eks-spiker Rəsul Quliyevin iqtidar və müxalifət partiyalarının birgə milli konfransının keçirilməsi təşəbbüsünə münasibət bildirərkən deyib. M. Qurbanlının sözlərinə görə, hakim partiya hər hansı formada xüsusi müzakirənin aparılmasını vacib hesab etmir: “Siyasi qüvvələr arasında dialoq mövcuddur, dialoq mühiti var. Amma hansısa məsələni müzakirə etmək üçün kimsə konfrans çağırmaq istəyirsə, buna ehtiyac görmürük. Dövlət, hökumət, parlament öz funksiyasını kifayət qədər yüksək səviyyədə yerinə yetirir”.

Azərbaycan Demokrat Partiyasının (ADP) sədr müavini Həsrət Rüstəmov R. Quliyevin irəli sürdüyü bu təklifin ADP-nin 2 il əvvəl irəli sürdüyü siyasi dialoq təklifinin oxşarı olduğunu deyb: “Təəssüf ki, o vaxt Rəsul Quliyev və tərəfdarları bu təklifə qarşı çıxdılar. Ümumilikdə isə təklif yaxşı təklifdir. Amma öz təcrübəmizdən çıxış edərək deyirəm ki, bu təklifin müxalifət qüvvələri tərəfindən irəli sürülməsinin əhəmiyyəti yoxdur. Bunu iqtidar istəməlidir. Əks halda heç bir nəticəsi olmayacaq”.

Klassik Xalq Cəbhəsi Partiyasının sədri Mirmahmud Mirəlioğlu isə R. Quliyevin təklifini yüksək qiymətləndirib. Onun fikrincə, belə bir konfransın keçirilməsinə ehtiyac var: “Azərbaycanın siyasi qüvvələri hər hansı vasitəçinin iştirakı olmadan bir araya gəlib müzakirələr aparmağı bacarmalıdır”.

Azərbaycan Xalq Cəbhəsi Partiyasının sədr müavini Nurəddin Məmmədli də bu vaxta qədər iqtidarla müxalifət arasında müzakirələrin aparılması barədə çoxlu təklifin olduğunu, lakin bunların heç birinin real nəticə vermədiyini bildirib: “Sözsüz ki, hər bir təklifə hörmətlə yanaşmaq lazımdır, o cümlədən Rəsul Quliyevin də təklifinə . Amma bu təşəbbüsün də perspektivinin olacağına inam yoxdur. Bizim partiya hazırda belə bir təşəbbüsə qoşulmaq niyyətində deyil. Çünki hakimiyyət belə təşəbbüslərə çox etinasız münasibət göstərir”.

Müsavat Partiyasının Mərkəzi İcra Aparatının rəhbəri Arif Hacılı isə APA-ya deyib ki, R. Quliyevin səsləndirdiyi fikirlər onu maraqlandırmır: “Çünki o zaman-zaman gah hakimiyyəti dəstəkləməyin lazım olduğunu bildirir, hakimiyyəti müdafiə edən mövqe sərgiləyir, gah da heç bir əsas olmadan müxalifətin əleyhinə ittihamlar səsləndirir. Ona görə də düşünürəm ki, Azərbaycanda olan ictimai-siyasi vəziyyətdən xəbəri yoxdur. Şəxsən mənim üçün onun təklifləri maraqlı deyil. Lazım bilsək, istənilən tədbirləri keçirə bilərik. Ancaq düşünürəm ki, Azərbaycan siyasətində Rəsul Quliyevlik iş yoxdur”.