Daxili siyasət

Ana səhifə

Daxili siyasət

Azərbaycan prezidentinin sədrliyi ilə Nazirlər Kabinetinin 2010-cu ilin 1-ci rübünün yekunlarına həsr olunmuş iclası keçirilib

14 aprel 2010 14:32 (UTC +04:00)

APA-nın AzTV-yə istinadən verdiyi məlumata görə, 2009-cu ildə ölkədə Ümumi Daxili Məhsulun (ÜDM) 9,3 faiz, ümumilikdə 2004-2009–cu illərdə isə 2,8 dəfə artdığını vurğulayan prezident bunu aparılan mükəmməl siyasi, iqtisadi və sosial islahatların məntiqi nəticəsi kimi dəyərləndirib.

Dövlət başçısı 2010-cu ildə də Azərbaycan iqtisadiyyatının uğurla inkişaf etdiyini, cari ilin ilk 3 ayında ÜDM-in 5,4 %, sənaye istehsalının 5,6 %, qeyri-neft sektorunun 2,8 % və kənd təsərrüfatının 1,5 % artdığını, inflyasiyanın 3,8 % səviyyəsində olduğunu bildirib.

Əhalinin banklara qoyduğu vəsaitlərin 30 % artdığını vurğulayan prezident Azərbaycanın strateji valyuta ehtiyatlarının 22,3 milyard dollar təşkil etdiyini deyib. Dövlət investisiya proqramının və ölkənin sənaye potensialının möhkəmləndirilməsinin müvəffəqiyyətlə icra edildiyini, sosial proqram və layihələrin həyata keçirilməsində heç bir problemin olmadığını vurğulayan dövlət başçısı cari ildə respublikamızda gəmiqayırma zavodunun bünövrəsinin qoyulmasını, müdafiə sənayesi üzrə 2 yeni müəssisənin fəaliyyətə başlamasını və digər silsilə obyektlərin istifadəyə verilməsini böyük uğur kimi dəyərləndirib. Prezident İ. Əliyev dünya iqtisadiyyatında maliyyə və iqtisadi böhranın hökm sürdüyü bir vaxtda Azərbaycanın sürətli inkişafını davam etdirməsinin iqtisadiyyatın şaxələndirilməsi və ölkəmizin rəqabətə davamlı olması ilə əlaqələndirib.

Dövlət başçısı Dünya İqtisadi Forumunun informasiya-kommunikasiya texnologiyalarının inkişafı üzrə Azərbaycanı MDB ölkələri arasında 1-ci yerə layiq görməsini də böyük uğur kimi qiymətləndirib.

Prezident İlham Əliyev bundan sonra da sosial məsələlərin həllinə dövlətin xüsusi diqqət göstərəcəyini, cari ildə də əmək haqqı və pensiyaların artırılacağını, regionlarda içməli su, kanalizasiya və digər sahələr üzrə bir sıra layihələrin reallaşdırılacağını bildirib.

Vergilər naziri Fazil Məmmədov, əmək və əhalinin sosial müdafiəsi naziri Füzuli Ələkbərov, Dövlət Gömrük Komitəsinin sədri Aydın Əliyev, Standartlaşdırma, Metrologiya və Patent üzrə Dövlət Agentliyinin baş direktoru Ramiz Həsənov cari ilin 3 ayında görülən işlərdən və qarşıda duran vəzifələrdən danışıblar.

İclasa yekun vuran prezident İ. Əliyev ölkədə makroiqtisadi sabitliyin möhkəmləndirilməsi və əhalinin sosial rifah halının yaxşılaşdırılması üçün növbəti tapşırıqlarını verdi. Keyfiyyətsiz məhsulların satışına nəzarətin gücləndirilməsi ilə bağlı tədbirlərin daha da ciddiləşdirilməsinin vacibliyini vurğulayıb. Dövlət başçısı infrastruktur, ekologiya və digər sahələr üzrə layihələrin genişləndirilməsinin zəruriliyini bildirib. Bakı buxtasının təmizlənməsi ilə bağlı kompleks təkliflərin hazırlanmasını tapşırıb.

Prezident möhtəşəm və bənzərsiz layihəsi ilə seçilən Dövlət Bayrağı Meydanın bu il istifadəyə veriləcəyini deyib. Azərbaycanın neft strategiyasını uğurla reallaşdırıldığını deyən dövlət başçısı ölkəmizin ixrac potensialının genişlənməsi ilə əlaqədar təbii qazın yeni ixrac marşrutları üzrə tədbirlərin davam etdirildiyini və respublikamızın “Cənub dəhlizi” çərçivəsində bütün layihələri tam dəstəklədiyini vurğulayıb.

Bu il Azərbaycanın qaz anbarlarının tutumunun 3 milyard kubmetrə qədər artırılacağını deyən prezident ölkəmizlə Türkiyə arasında təbii qazın satışı ilə bağlı danışıqların qarşılıqlı maraqlara və beynəlxalq təcrübəyə əsaslanmasını ən düzgün variant hesab etdiyini bildirib.

Rusiyaya satılan təbii qazın həcminin artırılması üçün ölkəmizin real imkanlara malik olduğunu qeyd edən dövlət başçısı İranla da bu istiqamətdə danışıqların aparıldığını söyləyib. Prezident İlham Əliyev qarşıda duran vəzifələrlə bağlı tapşırıqlarını verib.

İlham_Əliyev