Daxili siyasət

Ana səhifə

Daxili siyasət

ABŞ-ın Dağlıq Qarabağ münaqişəsinin həlli prosesində tutduğu mövqe Azərbaycan Milli Məclisində kəskin tənqid olunub

20 aprel 2010 10:01 (UTC +04:00)

APA-nın xəbərinə görə, deputat Vahid Əhmədov təbii fəlakətlərin ciddi narahatlıq yaratdığını, bununla bağlı dövlətin xüsusi proqramının olmasının zəruriliyini qeyd edib.

Deputat İkram İsrafil Müsavat Partiyasının mitinq keçirilməsinə şərait yaradılmasını istəyib.

Siyavuş Novruzov son vaxtlar işğalçı dövlətin maraqlarının müdafiə olunduğunu, Azərbaycana təzyiqlər edildiyini, Milli Məclisin məsələyə münasibət bildirməsinin vacibliyini vurğulayıb: “Biz işğalçı rejimə dəstək verilməsinin, ABŞ-ın ATƏT-in Minsk Prupunun üzvü ola-ola, Azərbaycanın ərazi bütövlüyü məsələsi müzakirə olunarkən bitərəf qalmasının, indi də Türkiyəyə təzyiq edilməsinin şahidi oluruq”.

Spiker Oqtay Əsədov mitinqlərin dünyanın hər yerində olduğu kimi ayrılmış yerlərdə keçirilməli olduğunu diqqətə çatdırıb: “Qanuna riayət olunmalıdır”.

Əli Əhmədov isə Ermənistan-Azərbaycan, Dağlıq Qarabağ münaqişəsinin nizama salınması istiqamətində təsirli tədbirlərin görülməsi ilə bağlı arzu edilən addımların atılmadığını deyib: “Türkiyə tərəfinin addımları bu işə dinamika verib. Biz onlara minnətdarıq. Həmsədrlərin fəaliyyətində isə bəzi təəssüfləndirici məqamlar var. Xüsusi ilə Türkiyənin münaqişə nizama salınacağı təqdirdə Ermənistanla sərhədlərini açacağı barədə bəyan etdiyi fikrə qarşı gedilir. ABŞ tərəfindən atılan bu addım vasitəçilik missiyasına uyğun gəlmir. Bu, dünyada ədalətli ölkə missiyasını üzərinə götürən bir dövlətin imicinə yaraşmır”.

İqbal Ağazadə Seçki Məcəlləsinə əlavə və dəyişikliklərin edilməyəcəyi halda, parlament seçkilərinin demokratik keçirilməsinin problem olacağını deyib.

Vitse-spiker Bahar Muradova isə Seçki Məcəlləsinin dəyişdirilməsinə ehtiyac olmadığını deyib. Onun sözlərinə görə, hazırkı məcəllə ilə dəfələrlə demokratik seçkilər keçirilib: “Ədalətli mübarizə aparıb, sivil yolla prosesə qoşulub nəticə əldə etmək lazımdır. Yoxsa kimlərinsə AŞ PA prezidenti bura səfər edərkən onunla görüşdən imtina etməsi gülünc hərəkətdir”.

Fəzail Ağamalı isə bildirib ki, Azərbaycan ABŞ-ın neft şirkətlərinin pay bölgüsünü əlindən almalı, onlarla sazişlərə yenidən baxmalıdır.

Dağlıq_Qarabağ