Daxili siyasət

Ana səhifə

Daxili siyasət

Azərbaycanla Türkdilli Ölkələrin Parlament Assambleyasının katibliyi arasında “Yerləşmə haqqında saziş” təsdiqlənib

20 aprel 2010 10:38 (UTC +04:00)

Bakı. Elbrus Seyfullayev - APA. Milli Məclisin aprelin 20-də keçirilən iclasında Azərbaycanla Türkdilli Ölkələrin Parlament Assambleyasının (Türk PA) katibliyi arasında “Yerləşmə haqqında saziş”in təsdiq edilməsi barədə məsələyə baxılıb. APA-nın xəbərinə görə, sənəd haqqında parlamentin Beynəlxalq münasibətlər və parlamentlərarası əlaqələr komitəsinin sədri Səməd Seyidov məlumat verib. O bildirib ki, Türk PA-nın katibliyinin Azərbaycan Milli Məclisində yerləşməsi mühüm hadisədir və təqdir olunmalıdır.

Spiker Oqtay Əsədov isə Türk PA-nın baş katibi və onun Türkiyə ilə Qazaxıstandan olan müavinlərini təqdim edib. Parlamentin sədri Qırğızıstanın hələlik təşkilata öz nümayəndəsini göndərmədiyini diqqətə çatdırıb: “Türk PA-nın katibliyinin Bakıda olması mühüm hadisədir”.

Qənirə Paşayeva Türk PA-nın katibliyinin Azərbaycanda yerləşməsinin bu quruma verilən önəmdən irəli gəldiyini söyləyib. O, Dağlıq Qarabağ münaqişəsinin tənzimlənməsində Azərbaycana qarşı haqsızlıqlar edildiyini vurğulayıb: “Təəssüf ki, Türkiyədə bəzi yazarlar Azərbaycanın və Türkiyənin birliyinə kölgə salmaq istəyirlər. Yalandan məlumat yayırlar ki, guya qondarma “erməni soyqırımı” Azərbaycanın heç marağında deyil. Ancaq onlar unudurlar ki, ABŞ-da bir qətnamə qəbul olunan kimi Azərbaycan parlamenti öz reaksiyasını bildirdi. Xüsusilə qarşıdan gələn 24 apreldə Türkiyə və Azərbaycan diasporu bir yerdə olmalı, bu böhtan və yalanların qarşısının alınmasında birlik nümayiş etdirməlidirlər”.

Fəzail İbrahimli isə deyib ki, Türk PA-nın yaradılmasının mənası böyükdür: “Elə bu qurumun yaradılması Türkiyə ilə Azərbaycanı ayırmaq istəyən dünya dövlətlərinə mesajdır. Bu, bizim tariximizin ən şərəfli səhifələrindən biridir”.

Müzakirələrdən sonra sənəd təsdiqlənib.

Azərbaycanın İnzibati Xətalar Məcəlləsinə və Ailə Məcəlləsinə dəyişikliklər və əlavələr edilməsi haqqında məsələyə də baxılıb. Bundan başqa, 2005-ci il 24 iyun tarixli 945-IIQ nömrəli qanunla təsdiqlənən “Vəzifəli şəxslər tərəfindən maliyyə xarakterli məlumatların təqdim edilməsi Qaydaları"na əlavələr edilib. 2005-ci il 28 iyun tarixli 961-IIQ saylı qanunla təsdiqlənən “Şəxsin cinayət məsuliyyətinə cəlb edilməsi üçün kifayət edən narkotik vasitələrin və psixotrop maddələrin miqdarına, habelə onların külli miqdarına görə siyahılar”da dəyişikliklər edilməsi haqqında sənəd də qəbul olunub.

milli_məclis