Daxili siyasət

Ana səhifə

Daxili siyasət

Azərbaycanın ədliyyə naziri Fikrət Məmmədov BMT-nin Cinayətkarlığın qarşısının alınması və cinayət ədliyyəsi üzrə Konqresinin vitse-prezidenti seçilib

21 aprel 2010 10:24 (UTC +04:00)

Bakı. Hafiz Heydərov-APA. BMT-nin cinayətkarlığın qarşısının alınması və cinayət ədliyyəsi üzrə 12-ci konqresi keçirilib. Bu barədə APA-ya Azərbaycan Ədliyyə Nazirliyinin mətbuat xidmətindən məlumat verilib.

Aprelin 12-dən 19-a kimi davam edən konqres Braziliyanın Salvador şəhərində baş tutub. Bütün ölkələrdən 3 min nəfərə yaxın nümayəndənin, o cümlədən ədliyyə və daxili işlər nazirləri, baş prokurorlar, digər hökumət üzvləri, nüfuzlu beynəlxalq təşkilatların rəhbər vəzifəli şəxslərinin iştirak etdiyi bu mötəbər forumda Azərbaycanı ədliyyə naziri Fikrət Məmmədovun rəhbərliyi ilə Baş Prokurorluğun, Ədliyyə, Milli Təhlükəsizlik, Daxili və Xarici İşlər nazirliklərinin məsul şəxslərindən ibarət nümayəndə heyəti təmsil edib.

Beş ildən bir keçirilən və qlobal səviyyədə cinayətkarlığa qarşı mübarizə siyasətini müəyyən edən bu tədbirin açılış mərasimində Konqresin rəhbərliyi formalaşdırılıb və Braziliyanın ədliyyə naziri Luis Paulo Barretto Konqresin prezidenti, Azərbaycanın ədliyyə naziri isə vitse-prezidentlərdən biri seçilib.

Azərbaycanın ədliyyə naziri Fikrət Məmmədov sessiyada çıxış edərək cinayətkarlığın qarşısının alınması, cinayət ədliyyəsi sisteminin və beynəlxalq əməkdaşlığın gücləndirilməsi üzrə tədbirləri vurğulayıb. Tədbirdə həmçinin iştirakçıların diqqəti Dağlıq Qarabağ münaqişəsinə, Ermənistan tərəfindən torpaqlarımızın işğalına, 1 milyon soydaşımızın qaçqın və məcburi köçkün vəziyyətinə düşməsi faktına yönəldilib.

Toplantının sonunda cinayətkarlıqla mübarizə üzrə səylərin gücləndirilməsinə dair Salvador Bəyannaməsi qəbul olunub.