Daxili siyasət

Ana səhifə

Daxili siyasət

Müxalifət partiyalarının seçkilərdə əməkdaşlıq formalarına həsr olunmuş toplantı keçirilib

23 aprel 2010 10:28 (UTC +04:00)

Bakı. Elnur Məmmədli-APA. Azərbaycan Milli İstiqlal Partiyasının (AMİP) qərargahında parlament seçkilərində müxalifət partiyalarının əməkdaşlığına həsr olunmuş toplantı keçirilib. APA-nın məlumatına görə, müzakirələrə Ümid, Bütöv Azərbaycan Xalq Cəbhəsi, Böyük Quruluş, Böyük Azərbaycan, Klassik Xalq Cəbhəsi, Demokrat, Demokratik İslahatlar və digər partiyalarının təmsilçiləri qatılıb. AMİP-in Qurultaya hazırlıq üzrə Təşkilat Komitəsinin sədri Arzuxan Əlizadə bildirib ki, seçkilərdə müxalifət partiyalarının əməkdaşlığına ehtiyac var: “Ən azı namizədlərin irəli sürülməsi, qarşılıqlı ittihamların olmaması məsələlərində razılıq əldə oluna bilər”.

AMİP-in mətbuat və təbliğat katibi Əli Orucov isə bildirib ki, parlament seçkilərində müxalifətin əməkdaşlıq edə biləcəyi məqamlar indidən qurulmalı və ilkin addımlar atılmalıdır.

Bütöv Azərbaycan Xalq Cəbhəsi Partiyasının sədri Qüdrət Həsənquliyev Azərbaycanda müxalifət partiyaları arasında ciddi əməkdaşlığın olmadığını deyib. Onun sözlərinə görə, hər bir partiyanın lideri yalnız onun kimi düşünənlərlə əməkdaşlıq edir, digərlərini isə xəyanətkar elan edirlər: “Səmimi şəkildə bildirmək lazımdır ki, səninlə əməkdaşlıq etmirəm. Yoxsa kimisə casus, agent elan etmək doğru deyil. Biz seçkilərlə bağlı əməkdaşlığa hazırıq. Bəzi partiyalarla seçkilərdə vahid namizədlə çıxış edə bilərik. Amma müxalifətdən olan o namizədləri dəstəkləyəcəyik ki, oradan bizim namizədimiz olmayacaq”.

Klassik Xalq Cəbhəsi Partiyasının sədr müavini Bəybala Əbil bildirib ki, müxalifətdən çox şey asılıdır və bu missiya həyata keçirilmir: “Müxalifət parlamentdəki 125 nisyə yeri razılaşdıra bilmir”.

ADP sədrinin müavini Taliyət Əliyev müxalifətin ümumi birliyinin yaranacağına ümid etmədiyini deyib: “Amma ən azı bir razılaşma ola bilər ki, müşahidəçilərin fəaliyyəti əlaqələndirilsin, qarşılıqlı təbliğat aparılmasın. Bunun özü böyük bir uğur olar”.

Ümid Partiyasının sədri İqbal Ağazadə bildirib ki, “müxalifət bir yerdə olmalıdır” fikri ortaya çıxan kimi ciddi parçalanma və mübahisələr yaranır: “Mən vahid namizədin, vahid blokun əleyhinəyəm. Amma demokratik proseslər üçün birgə addımlar atılmalıdır”. Onun sözlərinə görə, vahid namizədlər müəyyən edilərkən o zaman həmin dairədən namizəd olmağa digər iddialı şəxslər proseslərdən kənarda qalır və bu da demokratikləşmə prosesinə zərər vurur. İ. Ağazadə bildirib ki, bloklar hər bir dairə üzrə yaradılmalıdır.