Daxili siyasət

Ana səhifə

Daxili siyasət

Azərbaycan prezidenti Müdafiə Nazirliyində müşavirə keçirib

23 aprel 2010 16:31 (UTC +04:00)

APA-nın AzTV-yə istinadən verdiyi məlumata görə, Ali Baş Komandan deyib ki, ordu quruculuğu Azərbaycanda hər zaman diqqət mərkəzindədir: “Bu bizim üçün əsas məsələdir. Çünki uzun illərdir Azərbaycan torpaqları işğal altındadır”.

Dövlət başçısı Azərbaycanın öz hərbi imkanlarını maksimum dərəcədə gücləndirməsinin zərurətdən yarandığını diqqətə çatdırıb: “Ermənistan və havadarları işğal prosesində xüsusi qəddarlıq törədiblər. Xocalı soyqırımı bunun bariz nümunəsidir. Ermənistan bütün hüquq normalarını kobudcasına pozur. BMT Təhlükəsizlik Şurasının işğal olunan Azərbaycan torpaqlarının azad edilməsi ilə bağlı 4 qətnaməsinin olmasına baxmayaraq, Ermənistan bu qərarları yerinə yetirmir”.

Dövlət başçısı yenilənmiş Madrid prinsiplərinə də münasibət bildirib, son təkliflərin sazişin hazırlanması üçün əsas ola biləcəyini diqqətə çatdırıb: “Bir daha demək istəyirəm ki, Azərbaycanın ərazi bütövlüyü müzakirə mövzusu olmayıb və olmayacaq. Ermənistan danışıqlar prosesini uzatmaqla işğal etdiyi torpaqlardan çıxmaq istəmir. Bizim ən böyük kompromisimiz 20 ildir, Azərbaycanın hələ də sülh prosesinə sadiq olmasıdır. Beynəlxalq aləm öz qərarlarına hörmətlə yanaşmalıdır. Ermənistan-Azərbaycan, Dağlıq Qarabağ münaqişəsi həll olunmadan bölgədə heç bir problem həll edilə bilməz. Çünki bu münaqişə bölgədəki proseslərə ciddi təsir edir”.

Müşavirənin əhəmiyyətindən danışan dövlət başçısı bildirib ki, Azərbaycanda hərbi sahənin inkişafı diqqət mərkəzindədir. Ölkədə hərbi hazırlıq səviyyəsi də yüksəkdir, son 5-6 ildə hərbi xərclər 10 dəfədən çox artıb, hərbi sənaye inkişaf edir, çoxlu texnika alınıb: “Bu bizim təbii haqqımızdır. Bu gün Azərbaycan ordusu bütün sahələrdə Ermənistan ordusundan daha güclü və daha peşəkardır. Azərbaycan bu bölgədə nadir ölkələrdəndir ki, heç kimin yardımından asılı deyil”.

Sonra müdafiə naziri, general-polkovnik Səfər Əbiyev ordu quruculuğu istiqamətində həyata keçirilən tədbirlər barədə məruzə edib.

Bunun ardınca müşavirədə ordu quruculuğu ilə bağlı məsələlər müzakirə olunub.