Daxili siyasət

Ana səhifə

Daxili siyasət

Milli Məclisin iclasında deputatlar cari məsələlərlə bağlı təkliflər səsləndiriblər

27 aprel 2010 10:00 (UTC +04:00)

Bakı. Elbrus Seyfullyev - APA. Milli Məclisin bugünkü iclasında cari məsələlərə ayrılan vaxt zamanı çıxış edən deputatlar bəzi təkliflər səsləndiriblər. APA-nın xəbərinə görə, deputat Aqil Abbas deyib ki, sabah İsrail parlamentində qondarma “erməni soyqırımı” müzakirə olunacaq: “Milli Məclisdə Azərbaycan-İsrail parlamentlərarası dostluq qrupu adından buna etiraz edilməlidir. Türkiyəyə dəstək ifadə edilməlidir”.
Millət vəkili Yevda Abramov məsələyə münasibət bildirib. Deputat mayın 4-də İsrailə səfər edəcəyini və bu məsələ ilə bağlı narahatlığa əsas görmədiyini deyib: “Sabah qondarma soyqırımı müzakirə olunmayacaq. Sadəcə, məsələnin gündəliyə daxil edilib -edilməməsi müzakirə olunacaq”.

Spiker Oqtay Əsədov da İsrail parlamentində belə bir məsələnin müzakirəyə çıxarılmayacağına əmin olduğunu bildirib.

Deputat İqbal Ağazadə isə jurnalist Eynulla Fətullayevlə bağlı Avropa İnsan Hüquqları Məhkəməsi tərəfindən çıxarılan qərar barədə danışıb: “Bu qərar icra olunmalıdır: “Biz bunu dəfələrlə demişdik ki, məsələnin Avropa Məhkəməsinə qədər gedib çıxmasına yol vermək olmaz”.

Millət vəkili Mübariz Qurbanlı isə məsələyə münasibət bildirərək deyib ki, Avropa Məhkəməsinin qərarını siyasiləşdirməyə ehtiyac yoxdur: “Bu yuxarı instansiya deyil. Məsələni ayrıca şişirtməyə ehtiyac yoxdur. Tək Azərbaycana qarşı deyil, bir çox ölkələrə qarşı belə qərarlar çıxarılıb. Vaxtı ilə Türkiyəyə qarşı da təzyiq xarakterli belə qərarlar qəbul olunub”.

MM sədrinin birinci müavini Ziyafət Əsgərov da məsələyə münasibət bildirib: “Adətən bizə irad tuturlar ki, sizdə məhkəmələr siyasiləşib. Hansı ölkəyə qarşı təzyiq etmək istəyirlərsə, belə bir qərar çıxarırlar. Ancaq Avropa Məhkəməsinin özü siyasiləşib. Avropa Məhkəməsinin heç bir qərarı məcburi deyil. Sadəcə, tövsiyə edilə bilər. Azərbaycan artıq bu məsələ ilə bağlı məhkəmənin Böyük Palatasına şikayət edib. İndi bu şikayətə baxılacaq və sonra Azərbaycan Ali Məhkəməsi işə baxacaq. Ali Məhkəmənin plenumunda bu qərara baxılacaq və bundan sonra hansı qərarın qəbul olunacağı müəyyənləşəcək. Biz hüquqi dövlətdə yaşayırıq. Dediyim prosedurlardan sonra məsələyə nöqtə qoyulacaq”.

Deputat Qüdrət Həsənquliyev isə ABŞ tərəfindən Azərbaycan və Türkiyəyə edilən təzyiqlər barədə danışıb. Millət vəkili deyib ki, təzyiqlərə baxmayaraq, Ermənistan-Türkiyəyə protokollarının ratifikasiyası baş tutmadı: “Biz Türkiyə tərəfinə öz təşəkkürümüzü bildiririk. Ermənistan Türkiyəyə qarşı düşmənçilik siyasətini davam etdirir. Ermənistan küçələrində Türkiyə dövlətinin və hökumətinin rəhbərlinin portretlərini yandırdılar. Biz Türkiyəyə müraciət edək ki, Türkiyə Ermənistanla hava əlaqələrini də kəssin. Biz də qazın satışında Türkiyəyə müəyyən güzəştlər edə bilərik. Bundan başqa, Ermənistanda fəaliyyət göstərən beynəlxalq şirkətlər Azərbaycanda fəaliyyət göstərə bilməməlidirlər. Bununla bağlı qanun qəbul etməliyik”.

Milli Məclis