Daxili siyasət

Ana səhifə

Daxili siyasət

Milli Məclis Zakir Qaralovun növbəti müddətə Azərbaycanın baş prokuroru vəzifəsinə təsdiq edilməsi ilə bağlı qanun layihəsini qəbul edib

27 aprel 2010 10:15 (UTC +04:00)

APA-nın xəbərinə görə, müzakirələrdə çıxış edən spiker Oqtay Əsədov deyib ki, Zakir Qaralov uzun müddətdir ki, prokurorluq sistemində çalışır: “O 10 ildir ki, baş prokuror vəzifəsini icra edir. İndiyə kimi çox təqdirəlayiq fəaliyyət göstərib”.

Milli Məclisin Hüquq siyasəti və dövlət quruculuğu komitəsinin sədri Əli Hüseynov isə Zakir Qaralovun baş prokuror işlədiyi müddətdə prokurorluq sistemində ciddi irəliləyişlərə nail olduğunu, son illər bu sahədə islahatların uğurla davam etdiyini deyib.

Deputat Azay Quliyev deyib ki, Zakir Qaralov baş prokuror olduğu müddətdə ona göstərilən etimadı doğruldub, layiqli fəaliyyət göstərib: “Zakir Qaralovun bundan sonra da uğurlu fəaliyyət göstərəcəyinə əminik”.

Spiker Oqtay Əsədov bildirib ki, Zakir Qaralovun bu vəzifəyə təyinatı ən gözəl təqdimatlardan biridir.

Müzakirələrdən sonra Zakir Qaralov yenidən Azərbaycanın baş prokuroru vəzifəsinə təsdiqlənib. Deputatlardan 103 nəfər təyinatın lehinə, 6 nəfər isə əleyhinə səs verib.

Qeyd edək ki, qanunvericiyə əsasən, Azərbaycanın baş prokuroru vəzifəsinə təyinat 5 ildən bir keçirilir. Artıq ikinci müddət baş prokuror kimi çalışan Z. Qaralovun isə səlahiyyət müddəti aprelin 25-də başa çatır.

Bir neçə gün əvvəl isə Azərbaycan prezidenti Zakir Qaralovun yenidən baş prokuror vəzifəsinə təsdiq edilməsi ilə bağlı qanun layihəsini parlamentə göndərib.

Xatırladaq ki, ötən il “Prokurorluq haqqında” qanuna dəyişiklik edilərək, sənədin 16-cı maddəsinin 2-ci hissəsindən “Eyni şəxs iki dəfədən artıq təkrarən Azərbaycan Respublikasının baş prokuroru, Azərbaycan Respublikasının hərbi prokuroru, Naxçıvan Muxtar Respublikası prokuroru vəzifəsinə təyin edilə bilməz” cümləsi çıxarılıb.

Dosye. Zakir Bəkir oğlu Qaralov 1956-cı ildə Gürcüstan Respublikasının Dmanisi şəhərində anadan olub. 1973-cü ildə əmək fəaliyyətinə fəhləlikdən başlayıb. 1979-cu ildə Bakı Dövlət Universitetinin hüquq fakültəsinin əyani şöbəsini bitirdikdən sonra prokurorluq orqanlarında işə qəbul edilməklə, Bakı şəhəri Səbail rayon prokurorunun köməkçisi, Respublika Prokurorluğunda şöbə prokuroru və böyük prokuror, Bakı şəhəri Nəsimi rayon prokurorunun müavini və həmin rayonun prokuroru vəzifələrində çalışıb. 1991-1995-ci illərdə Respublika Prokurorluğunda məsul vəzifələrdə çalışan Z.B.Qaralov 1995-ci ildə Bakı şəhəri Sabunçu rayon prokuroru təyin edilib, həmin vəzifədə Baş ədliyyə müşaviri xüsusi rütbəsinə layiq görülüb. Z. Qaralov 1998-ci ildə Gəncə şəhər prokuroru vəzifəsinə təyin edilib. Heydər Əliyevin 26 aprel 2000-ci il tarixli fərmanı ilə Azərbaycan Respublikasının Baş prokuroru vəzifəsinə təyin edilib, III dərəcəli dövlət ədliyyə müşaviri rütbəsinə layiq görülüb. Dövlət başçısı İlham Əliyev tərəfindən Z. Qaralov 26 aprel 2005-ci il tarixdə ikinci konstitusiya müddətinə Azərbaycan Respublikasının Baş prokuroru təyin edilib.