Daxili siyasət

Ana səhifə

Daxili siyasət

Avropa Şurasının Korrupsiya ilə mübarizə üzrə Dövlət Qrupunun nümayəndə heyəti ilə Milli Məclisdəki siyasi partiyalarının təmsilçiləri arasında görüş keçirilib

28 aprel 2010 16:04 (UTC +04:00)

Bakı. Elbrus Seyfullayev - APA. Milli Məclisdə Avropa Şurasının Korrupsiya ilə mübarizə üzrə Dövlət Qrupunun (GREKO) nümayəndə heyəti ilə YAP, Müsavat, BAXCP, BQP və Ana Vətən partiyalarının rəhbərləri və təmsilçiləri arasında görüş keçirilib. APA-nın xəbərinə görə, görüşdə Azərbaycanda fəaliyyət göstərən siyasi partiyaları maliyyələşməsi sahəsində şəffaflığın təmin edilməsi və digər məsələlərlə bağlı müzakirələr aparılıb.

BAXCP sədri Qüdrət Həsənquliyev partiyaların maliyyələşməsi sahəsində çoxsaylı problemlərin olduğunu bildirib: “Bu gün müxalifət partiyalarının maliyyələşməsi elə vəziyyətdədir ki, şəffaflıq və bu kimi məsələlər haqqında danışmağa belə dəyməz. Şəffaflıqdan vəsait olan yerdə danışarlar. Pul var ki, şəffaflıq da olsun? Hazırda partiyaların ianələr yolu ilə maliyyələşməsi də real deyil. Çünki müxalifət partiyaları o qədər zəifdir ki, hər hansı iş adamı onların maliyyələşməsində maraqlı görünmür, buna cəsarət də etmirlər. Bu baxımdan ölkədə çoxpartiyalı sistemin, siyasi palitranın zənginliyinin qorunması üçün ilk növbədə siyasi partiyaların dövlət tərəfindən maliyyələşdirilməsi problemini həll etmək lazımdır” .

Qeyd edək ki, aprelin 27-də Respublika Prokurorluğunun tədris mərkəzində Avropa Şurası Korrupsiya ilə mübarizə üzrə Dövlət Qrupunun nümayəndələri ilə siyasi partiyaların maliyyə məsələləri üzrə təmsilçiləri arasında da görüş keçirilib. Görüşdə YAP, BAXCP, BQP, AVP və Ədalət partiyalarının nümayəndələri iştirak edib.