Daxili siyasət

Ana səhifə

Daxili siyasət

Pənah Hüseyn: “Müsavatın DUİ-yə daxil olan partiyaların sədrlərinin namizədliyini dəstəkləməməsi yeganə səbəbi deyil”

29 aprel 2010 10:23 (UTC +04:00)

Bakı. Elnur Məmmədli – APA. “Biz geniş formatın olmadığı bir şəraitdə Müsavat Partiyası ilə Demokratiya Uğrunda İttifaq arasında əməkdaşlığın daha dərin olacağını düşünürdük və yalnız bu halda əməkdaşlığın mənası olması qənaətindəyik. Amma danışıqlarda məlum olub ki, bu razılaşma gündəmdə deyil və yeni şərtlər meydana çıxıb”. Bunu APA-ya açıqlamasında DUİ-də təmsil olunan Azərbaycan Xalq Partiyasının üzvü, millət vəkili Pənah Hüseyn deyib. Onun sözlərinə görə, əvvəlki müzakirələrdə DUİ-yə daxil olan partiyaların rəhbərlərin Müsavat Partiyası tərəfindən, Müsavatın namizədlərinin isə DUİ tərəfindən dəstəklənməsi vacib sayılıb: “Şərtlər dəyişdiyi üçün AXP-nin mövqeyi ondan ibarətdir ki, indiki halda DUİ ilə Müsavat arasında bağlanmış niyyət protokolu ilə özünü bağlı hesab etmədiyini bəyan edir və danışıqlarda iştirakını dayandırır. Amma AXP DUİ daxilində fəaliyyətini davam etdirir”. P. Hüseyn bildirib ki, Müsavat Partiyası DUİ-yə daxil olan partiyaların bəzilərinin sədrlərini dəstəkləmək niyyətində deyil, buna görə də AXP danışıqlarda iştirak etməyəcək: “Amma daha geniş birlik yaranarsa, orada iştirakın əleyhinə deyilik. Həmçinin, Müsavatın da fikrinə hörmətlə yanaşırıq və belə bir taktikanın seçilməsini təbii hesab edirik. Bu, hansısa böhran, qarşıdurma kimi dəyərləndirməməlidir”. P. Hüseyn AXP-nin belə bir mövqe tutmasına Müsavatın DUİ-yə daxil olan partiyaların sədrlərinin namizədliyini dəstəkləməməsinin yeganə səbəb olmadığını da vurğulayıb. Lakin o, digər səbəbləri açıqlamayıb.

DUİ-də təmsil olunan Klassik Xalq Cəbhəsi Partiyasının sədri Mirmahmud Mirəlioğlu isə APA-ya bildirib ki, bu məsələ tərəflər arasında niyyət protokolu imzalanandan sonra ortaya çıxıb: “Buna görə də imzalanmadan sonra DUİ-nin toplantısı oldu. Amma hələ son söz deyilməyib. Pənah Hüseynin etiraz etməsi onun haqqıdır. Biz gələn həftə bu məsələləri müzakirə edəcəyik”.

Müsavat Partiyası Mərkəzi İcra Aparatının rəhbəri Arif Hacılı isə APA-ya bu danışıqlarda P. Hüseynin üzv olduğu təşkilatın sədri olan Qiyas Sadıxovun iştirak etdiyini deyib: “Hər hansı narazılıq vardısa, bunu danışıqlar vaxtı bildirmək lazım idi. Mənə elə gəlir ki, Pənah Hüseyn cəmiyyətə siyasi sürprizlər təqdim etmək üzrə fərqlənən siyasətçilərdəndir, bu da onun növbəti sürprizlərindən biridir. Müəyyən dairələrdə DUİ-nin namizədləri müdafiə oluna da bilər, olunmaya da. Burada hər hansı məcburiyyət yoxdur. DUİ-nin elə namizədləri var ki, təbii ki, biz öz namizədlərimizi qoyub, onları müdafiə etməyəcəyik. Bu tamamilə aydındır. Pənah Hüseyn bunun əleyhinədirsə, bu prosesdən kənarlaşa bilər. Bu onun hüququdur”.

Müsavat_DİU