Daxili siyasət

Ana səhifə

Daxili siyasət

Heydər Əliyevin anadan olmasının 87-ci ildönümü münasibətilə dəyirmi masa keçirilib

05 may 2010 11:32 (UTC +04:00)

Bakı. Kəmalə Quliyeva-APA. “Səs” qəzetinin redaksiyasında ümummilli lider Heydər Əliyevin anadan olmasının 87-ci il dönümü münasibəti ilə dəyirmi masa keçirilib. APA-nın məlumatına görə, dəyirmi masada çıxış edən Prezident Administrasiyasının beynəlxalq əlaqələr şöbəsinin müdiri Novruz Məmmədov bildirib ki, ümummilli liderlə işləyən insanlarla belə müzakirələrin aparılması həm bu insanlara, həm də gələcək nəsillərə lazımdır: “Mən Heydər Əliyevi insan qalaktikasının parlaq bir ulduzu hesab edirəm. Xoşbəxtəm ki, onunla bir yerdə işləmişəm. Həyatda başqa heç nəyə nail olmasaydım da, bu mənim üçün kifayət edir. Dünyanın 60-dan çox ölkəsinin rəhbərlərinin bir neçə nəsli ilə tanış olmuşam, Heydər Əliyev kimi şəxsiyyət və dövlət başçısı görə bilməmişəm”.

Sabiq millət vəkili Kərim Kərimli isə deyib ki, Heydər Əliyevin ölümündən sonra onun haqqında 100-dən artıq kitab yazılıb: “Onların içərisində çox dəyərli kitablarla yanaşı, Heydər Əliyevin həyat fəaliyyətinə yaraşmayan kitablar da var. Xüsusən də onun Moskvadan Bakıya qayıtdıqdan sonrakı aylarda SSRİ-yə qarşı fəaliyyəti bu kitablarda o qədər də yaxşı əks olunmayıb”.

Milli Məclisin komitə sədri Eldar İbrahimov isə deyib ki, H. Əliyevin ən önəmli xidmətlərindən biri onun Naxçıvan Ali Sovetinin sessiyasını çağıraraq üçrəngli bayrağı Muxtar Respublikanın bayrağı kimi qəbul etməsi olub: “Naxçıvan o zaman SSRİ-nin saxlanılması ilə bağlı referendumda da iştirak etməyib. Heydər Əliyevi hakimiyyətə gəlməyə çağıran “91-lər”i kölgədə qoymaq lazım deyil”.