Daxili siyasət

Ana səhifə

Daxili siyasət

Millət vəkili Qənirə Paşayeva Tovuz rayonunda keçirilən bir sıra tədbirlərdə iştirak edib

10 may 2010 09:47 (UTC +04:00)

Tovuz. Ayxan Hüseynov - APA. Tovuz rayonunda millət vəkili Qənirə Paşayevanın iştirakı ilə bir sıra tədbirlər keçirilib.

APA-nın Qərb bürosunun verdiyi məlumata görə, Qənirə Paşayeva və Tovuz rayon İcra Hakimiyyətinin başçısı Tofiq Zeynalov Heydər Əliyevin abidəsini ziyarət edərək abidə önünə gül qoyublar.

Daha sonra Heydər Əliyevin Xatirə Muzeyində rayon ictimaiyyətinin iştirakı ilə faşizm üzərində qələbənin 65-ci və Heydər Əliyevin anadan olmasının 87-ci ildönümü ilə əlaqədar tədbir keçirilib. Tofiq Zeynalov və Qənirə Paşayeva tədbirə qatılmış veteranları qələbənin 65 illiyi münasibətilə təbrik ediblər. T.Zeynalov çıxışında Tovuz rayonunda 124 İkinci Dünya müharibəsi veteranının yaşadığını, onların rayon rəhbərliyi tərəfindən daim diqqət və qayğı ilə əhatə olunduqlarını bildirib.

Millət vəkili Qənirə Paşayeva isə öz növbəsində veteranları qələbənin 65 illiyi münasibətilə təbrik edərək, avtomobil almaq növbəsi çatmış İkinci Dünya müharibəsi veteranı Ənvər Tağıyevə Əmək və Əhalinin Sosial Müdafiəsi Nazirliyi tərəfindən verilmiş maşının açarlarını təqdim edib. Bundan sonra millət vəkili tərəfindən digər müharibəsi veteranlarına da hədiyyələr təqdim edilib.

Daha sonra millət vəkili Qənirə Paşayeva və icra başçısı Tofiq Zeynalov Qəhrəmanlar parkına yollanaraq, burada 1941-1945-ci il Böyük Vətən müharibəsində həlak olanların xatirəsinə ucaldılmış abidəni və Tovuz rayonunda doğulmuş Sovet İttifaqı Qəhrəmanları Yusif Sadıqov, Məstan Əliyev və Mərdan Musayevin abidələrini ziyarət ediblər.

Tovuz rayonunda yerləşən “N” saylı hərbi hissədə davam edən tədbirdə çıxış edən millət vəkili Qənirə Paşayeva və icra başçısı Tofiq Zeynalov əsgərləri and içmə günü, faşizm üzərində qələbənin 65 illiyi və Heydər Əliyevin anadan olmasının 87-ci ildönümü münasibətilə təbrik ediblər. Millət vəkili Qənirə Paşayeva hərbi xidmətdə fərqlənən zabit və əsgərlərə öz hədiyyələrini, eləcə də Milli Qəhrəmanlarımızdan bəhs edən kitab təqdim edib.