Daxili siyasət

Ana səhifə

Daxili siyasət

Fövqəladə Hallar Nazirliyində Heydər Əliyevin anadan olmasının 87-ci ildönümü münasibətilə mərasim keçirilib

10 may 2010 14:49 (UTC +04:00)

Bakı. Ramil Məmmədli – APA. Bu gün Fövqəladə Hallar Nazirliyində (FHN) Heydər Əliyevin anadan olmasının 87-ci ildönümü münasibətilə mərasim keçirilib.

APA-nın məlumatına görə, fövqəladə hallar naziri general-polkovnik Kəmaləddin Heydərov mərasimdə çıxış edərək müasir Azərbaycan dövlətinin qurucusu H.Əliyevin həyat yolundan, vətən və xalq qarşısında tarixi xidmətlərindən danışıb, o cümlədən Azərbaycanda sosial-iqtisadi həyatın bütün sferalarında qazanılan nailiyyətlərdən bəhs edib.

K.Heydərov deyib ki, Azərbaycanın müasir tarixinin böyük, həm də şərəfli bir dövrü H.Əliyevin adı ilə bağlıdır: “Onun həyatı hər bir azərbaycanlı üçün əsl məktəbdir. Azərbaycana rəhbərliyinin bütün dövrlərində müdrik uzaqgörənliyi, böyük idarəçilik qabiliyyəti ilə qəlbində sonsuz vətən sevgisinə malik ulu öndər Azərbaycanı sözün əsl mənasında qurub-yaradıb, onun dünya dövlətləri arasında layiqli yer tutmasını şərtləndirən möhkəm bazanı formalaşdırıb”.

Müstəqil Azərbaycanın bu gün özünün tərəqqi dövrünü yaşadığını deyən nazir H.Əliyevin siyasi xəttinin layiqli davamçısı prezident İlham Əliyevin rəhbərliyi ilə Azərbaycanın dünyanın ən sabit, sosial-iqtisadi cəhətdən böyük sürətlə inkişaf edən ölkəsinə çevrildiyini vurğulayıb.

Mərasimdə iştirak edən Milli Məclisin Hüquq siyasəti və dövlət quruculuğu komitəsinin sədri, millət vəkili Əli Hüseynov H.Əliyevlə bağlı xatirələrindən, onun Azərbaycan qarşısındakı misilsiz xidmətlərindən danışıb. Ə.Hüseynov deyib ki, H.Əliyevin Azərbaycanda banisi olduğu hüquqi dövlət və vətəndaş cəmiyyəti modeli bu gün dünyada öz unikallığı ilə seçilir. Onun sözlərinə görə, H.Əliyev qüdrətli dövlət qurmaqla və onun sürətli sosial-iqtisadi inkişafının möhkəm əsaslarını formalaşdırmaqla bərabər, Azərbaycanın xarici siyasətinin, dünyanın aparıcı dövlətləri və beynəlxalq təşkilatları ilə əlaqələrinin milli maraqlara əsaslanan xətt üzrə inkişafını təmin edib.

Mərasimə yekun vuran K.Heydərov bildirib ki, FHN-in kollektivi H.Əliyevin ideyalarına, dövlətçilik xəttinə sadiq qalaraq bundan sonra da bütün qüvvə və bacarığını müstəqil Azərbaycanın yüksəlişi və tərəqqisi naminə səfərbər edəcək.