Daxili siyasət

Ana səhifə

Daxili siyasət

“Mülkiyyət hüquqları: mövcud qanunvericilik və reallıqlar” mövzusunda dəyirmi masa keçirilib

12 may 2010 09:19 (UTC +04:00)

Bakı. Elnur Məmmədli – APA. Azərbaycan Milli İstiqlal Partiyası (AMİP) “Mülkiyyət hüquqları: mövcud qanunvericilik və reallıqlar” mövzusunda dəyirmi masa keçirib. APA-nın məlumatına görə, tədbirdə siyasi partiyaların rəhbərləri, ekspertlər və hüquqşünaslar iştirak edib.

AMİP sədrinin müavini Yusif Bağırzadə bildirib ki, bütün zamanlarda insanların mülkiyyət hüququ toxunulmaz hesab olunub. O, bir müddət əvvəl Azərbaycan parlamentində “Torpaqların dövlət ehtiyacı üçün alınması haqqında” qanun qəbul edildiyini və burada hansı hallarda vətəndaşlardan torpaqların alınmasının öz əksini tapdığını söyləyib.

Hüquqşünas Fuad Ağayev isə son illərdə paytaxtın müxtəlif yerlərində yolların çəkilməsi zamanı vətəndaşların mülkiyyət hüquqlarının pozulduğunu, torpaqların vətəndaşlardan alınması müqabilində onlara verilən kompensasiyanın az olduğunu deyib.

Bütöv Azərbaycan Xalq Cəbhəsi Partiyasının sədri Qüdrət Həsənquliyev də qanunda vətəndaşların əleyhinə işləyən məqamların olduğunu vurğulayıb: “Parlamentdə bu məqamların aradan qaldırılması üçün dəfələrlə təkliflər irəli sürsək də, buna nail ola bilmədik və parlament çoxluğu qanunu bu şəkildə qəbul etdi”.

Demokratik İslahatlar Partiyasının (DİP) sədri Asim Mollazadə isə Azərbaycanda heç vaxt mülkiyyət hüquqlarının qorunmadığını bəyan edib: “Sovet dövründə də belə olub. Bizdə mülkiyyət hüququ yaranmalıdır, bunun üçün də təfəkkürlərdə inqilab olmalıdır. Postsovet məkanında mülkiyyət məsələləri siyasi qərarlarla, sadəcə, telefon zəngləri ilə həll edilir. İqtidarlar dəyişə bilər, amma mülkiyyət hüququ yenə də belə qalacaq. Ona görə də təfəkkürdə dəyişiklik lazımdır”.

Millət vəkili Vahid Əhmədov isə çıxışında bildirib ki, Azərbaycanda siyasi liderlər tez-tez əqidələrini dəyişirlər: “Saat 5-ə kimi müxalifət, 5-dən sonra iqtidar olan siyasi liderlər var. Ona görə də birləşə bilmirik”.