Daxili siyasət

Ana səhifə

Daxili siyasət

Əli Əliyev: “Müsavat Partiyası hakimiyyətlə ticarət məqsədi güdür”

17 may 2010 14:10 (UTC +04:00)

Bakı. Elnur Məmmədli - APA. “Müsavat Partiyası birinci şəxsdən başlamış digər şəxslər də daxil olmaqla, xeyli müddətdir, açıq sürətdə “Azadlıq” blokuna daxil olan AXCP-dən başqa, digər iki partiyanı nüfuzdan salmağa çalışır”. Bunu APA-ya açıqlamasında Vətəndaş və İnkişaf Partiyasının sədri Əli Əliyev deyib. Müsavat deputat qrupunun üzvü İkram İsrafilin “Azadlıq blokunda AXCP-dən başqa təmsil olunan partiyaların arxasında 10 nəfər də təmsil olunmur” fikrinə münasibət bildirən Ə. Əliyevin sözlərinə görə, bu proses ötən ildən başlayıb və o zaman VİP tərəfindən bildirilib ki, bu proses heç kimin marağına uyğun deyil: “Amma nədənsə Müsavat öz siyasi xəttini davam etdirməkdədir, sanki kimlərəsə mesaj göndərməyə cəhd göstərilir ki, cəmiyyətdə hansı partiyalarla iş qurmaq olar. Bu, heç bir halda bizim maraqlarımıza cavab verə bilməz. Belə fəaliyyət üzdə olmayan maraqlara xidmət edir. Yəqin ki, bu, uzaqdan uzağa hakimiyyətlə ticarət məqsədi güdür. Mən hələ detallarına varmaq istəmirəm. Ümid edirəm ki, nə vaxtsa bu partiyanın təmsilçiləri ictimai mənafeyi əsas götürüb düzgün addımlar atacaqlar”.

Ə. Əliyevin sözlərinə görə, Müsavat rəhbərliyinə daxil olan şəxslərin son günlər mətbuata verdiyi açıqlamalar prosesi daha da qəlizləşdirib: “Onlar bildirirlər ki, guya 2005-ci ildə parlamentə getməklə Müsavat haqlı olub. Belə çıxır ki, həmin partiya üçün ictimai maraqlar mövcud deyil. Əgər qanunverici hakimiyyətin legitimləşdirilməsi, orada iştirak, milli mənafelərə vurulan zərbə bu partiyanın rayon təşkilatlarının gücləndirilməsi ilə arqumentləşdirirsə, deməli, bu partiyanın təmsilçiləri ancaq firqə maraqlarından, eqoist mövqedən çıxış edir, bu partiya üçün ümumiyyətlə milli maraqlar mövcud deyil. Sanki mesaj göndərilir ki, növbəti dəfə də biz bu prosesdə iştirak etməyə hazırıq. Biz hesab edirik ki, Müsavat 2005-ci ildə hakimiyyətlə sövdələşmədə iştirak etməsəydi, indi Azərbaycanda siyasi situasiya tam fərqli olardı. Bu çirkin prosesdə iştirakı qürurla və ağıllı bir addım kimi cəmiyyətə təqdim etmək ən azı milli maraqlara olan münasibətdən irəli gəlir. Bundan başqa, Anadolu türkcəsində “həm suçluyam, həm güclüyəm” deyimi var. Günahkar ola-ola başqanının üzərinə gəlmək, çamur atmaq daxili mədəniyyətsizliyin işarəsidir. Daxili mədəniyyət göstəriciləri var - abır, ismət, vicdan, ədalət hissi və s. Mənə elə gəlir ki, bu cür çıxış edən adamlar həmin keyfiyyətlərdən məhrumdurlar, ümumiyyətlə, daxili mədəniyyət anlayışı barədə məlumatsızdırlar. Abırlarına kor olub, sakit dayanmaqdandırsa, başqalarının üzərinə gəlməyi başa düşə bilmirəm. Ona görə də bundan sonra kimsə bizim partiyanın üzərinə gələcəksə, çox sərt cavab alacaq”.

Müsavat Partiyası ilə birgə aksiyaların keçirilməsinə gəldikdə, Ə. Əliyev hazırda belə bir müzakirənin aparılıb-aparılmamasından xəbərsiz olduğunu deyib: “Müsavat Partiyası özünü kifayət qədər təkəbbürlü aparmağa cəhd edir. Belə bir mövqe bizim üçün keçərli deyil. Onlar öz mövqelərindən imtina etməyənə qədər birgə tədbirlərin keçirilməsi çətin olacaq. Son dövrlər Müsavat Partiyasının rəhbərliyi qəribə açıqlamalarla çıxış edir, onların niyyəti yalnız AXCP ilə əməkdaşlıq etməkdir. AXCP də dəfələrlə “Azadlıq” blokundan kənar əməkdaşlıq formatı görmədiyini bildirib. Qarşı tərəf öz mövqeyinə korrektə etməlidir”.

Müsavat Deputat qrupunun üzvü İkram İsrafil isə APA-ya açıqlamasında bildirib ki, Ə. Əliyevin bu fikirləri indiki məqamda müxalifət partiyaları arasında gedən danışıqlara xeyir gətirmir: “Mən özünü müxalifət hesab edən təşkilat sədrinin bu məqamda belə fikirlər səsləndirməsini məqbul saymıram. Bilmirəm o nəyə görə belə bir mövqe sərgiləyir. Müsavat Partiyası real, nüfuzu olan müxalifət partiyaları ilə daim əməkdaşlıq edib, bundan sonra da edəcək”.

müxalifət