Daxili siyasət

Ana səhifə

Daxili siyasət

ATƏT-in Demokratik Təsisatlar və İnsan Haqları Bürosunun tövsiyələrinin yerinə yetirilməsinə həsr olunmuş ikinci dəyirmi masa keçirilir - FOTO

18 may 2010 09:58 (UTC +04:00)

Bakı. Viktoriya Dementyeva – APA. Bakıda ATƏT-in Demokratik Təsisatlar və İnsan Haqları Bürosunun tövsiyələrinin yerinə yetirilməsinə həsr olunmuş ikinci dəyirmi masa keçirilir. APA-nın xəbərinə görə, ATƏT-in Bakı ofisinin təşkilatçılığı ilə keçirilən dəyirmi masa seçkilərin təşkili, seçki komissiyalarının tərkibi, namizədlərin qeydiyyatı, şikayətlərə daha effektiv baxılması məsələləri müzakirə olunur.

Tədbirin açılışında çıxış edən ATƏT-in Bakı ofisinin rəhbəri Əli Bilgə Cankorel deyib ki, ATƏT noyabr ayında keçiriləcək parlament seçkiləri ərəfəsində Azərbaycan hökumətinin seçki mühitinin yaxşılaşdırılması istiqamətində səylərini dəstəkləyir. O bildirib ki, namizədlərin qeydiyyatı prosesinin düzgün aparılması bütün siyasi partiyaların seçkidə iştirakına geniş şərait yaradacaq.

ATƏT DTİHB-nin seçki bölməsinin nümayəndəsi Nikolas Kazorovski Azərbaycan hökumətinin seçki mühitinin yaxşılaşdırılması üçün ATƏT-lə dialoqu davam etdirməsini alqışlayıb. O qeyd edib ki, demokratik və yaxşı təşkil olunmuş seçki keçirməyin müstəqillik, ədalət, peşəkarlıq və şəffaflıq kimi bir neçə təməl standartı var. Qonaq əlavə edib ki, DTİHB yalnız tövsiyələr verə bilər, əməkdaşlıq formatını isə Azərbaycan seçir.

MSK katibi Natiq Məmmədov ATƏT DTİHB ilə sıx əməkdaşlıq etdiklərini, bu əməkdaşlığın getdikcə daha effektiv səviyyəyə gəldiyini söyləyib. O, MSK-nın qarşıdakı seçkilərlə əlaqədar ciddi iş apardığını, yerli seçki komissiyalarının üzvlərinin peşəkarlığının artırılmasına daha çox önəm verdiklərini vurğulayıb. N. Məmmədov Azərbaycan torpaqlarının bir hissəsinin işğalının seçki prosesinə təsir göstərdiyini, məcburi köçkünlərin siyahısının hazırlanmasında çətinliklərin ortaya çıxdığını diqqətə çatdırıb.

Sonra müzakirələr mətbuata qapalı davam etdirilib.

Dəyirmi masaya hökumət nümayəndələri, 17 siyasi partiyanın, eləcə də vətəndaş cəmiyyətinin, beynəlxalq təşkilatların və Azərbaycanda akkreditə olunmuş diplomatik missiyaların təmsilçiləri qatılıb.

ATƏT_Seçki