Daxili siyasət

Ana səhifə

Daxili siyasət

Müsavat Partiyasının başqanı ATƏT-in fəaliyyətini tənqid edib

18 may 2010 10:43 (UTC +04:00)

Bakı. Elnur Məmmədli – APA. “Azərbaycanda demokratik seçkilərin keçirilməsi ilə bağlı ATƏT ortaya mövqe qoymur, yalnız ümumi tövsiyələr verir. Mən hesab edirəm ki, ümumi tövsiyələrlə kifayətlənmək olmaz”.

APA-nın məlumatına görə, bunu Müsavat Partiyasının başqanı İsa Qəmbər ATƏT-in parlament seçkiləri öncəsi Azərbaycandakı təşəbbüslərinə münasibət bildirərkən deyib. İ. Qəmbər ATƏT-in Dağlıq Qarabağ problemi ilə bağlı mövqeyini də tənqid edib: “ ATƏT Ermənistanla Azərbaycana deyir ki, Dağlıq Qarabağla bağlı sizin əvəzinizə qərar qəbul etməyəcəyik, özünüz həll edin. Yəni işğalçı tərəflə işğala məruz qalan tərəfə fərq qoymur. Eyni qaydada ATƏT Azərbaycan da seçki məsələlərinə baxanda da deyirlər ki, bu barədə özünüz qərarlar qəbul edin ki, seçki komissiyalarının formatının bu şəkildə olması düzgündür, ya yox. İstər Qarabağ məsələsi, istərsə də seçkilərin demokratik keçirilməsində ATƏT dünyanın önəmli təşkilatlarından biri kimi aydın, birmənalı mövqe ortaya qoymalıdır. Biz hesab edirik ki, bu, daha düzgün olardı”.

İ. Qəmbər bildirib ki, Azərbaycanda keçirilən hər seçkidə müxalifətin bu prosesdə iştirak edib-etməmək məsələsi gündəmə gəlir: “Seçkilərdə iştirak edəndə bunun mənasının olmadığını, boykot edəndə də eyni fikir söylənilir. İstənilən halda biz demokratiya uğrunda mübarizə aparırıq. Bu missiya çərçivəsində də hesab edirik ki, indiki mərhələdə Azərbaycanın əksər siyasi qüvvələri seçkidə iştirak etmək əzmindədir”.

Azərbaycan Xalq Cəbhəsi Partiyasının sədri Əli Kərimli isə bildirib ki, seçkiöncəsi vəziyyətin demokratikləşməsi məsələsi nəzəri diskussiyalarla məhdudlaşmamalı, bunun praktik əhəmiyyəti olmalıdır: “ATƏT sərbəst toplaşmaq azadlığı haqqında apreldə tədbir keçirdi və bildirdi ki, Azərbaycanda sərbəst toplaşmaq azadlığı təmin olunmalıdır. Həmin vaxtdan bəri müxalifət üç dəfə aksiya keçirdi və üst-üstə 100-dən artıq iştirakçı həbs edildi”. Ə. Kərimli Azərbaycanda dialoq mühitinin olmadığını da deyib: “Seçkiləri boykot etmək və iştirak fərqli faktdır. Parlament seçkilərində iştirakın üstünlükləri daha çoxdur. Çünki seçkiyə çoxlu sayda namizəd qatılır və bu qədər insanın seçki qərargahlarına cəlb edəcəyi insanlar minlərlə fəalın prosesə cəlb edilməsi deməkdir. Parlament seçkilərində ictimai fəallığı artırmaq imkanları var. Ona görə də biz seçkidə iştirak etmək qərarındayıq”.