Daxili siyasət

Ana səhifə

Daxili siyasət

Azərbaycanda baş verən təbii fəlakət Milli Məclisdə müzakirə olunub

25 may 2010 10:05 (UTC +04:00)

Deputat Cəmil Həsənli deyib ki, yaxın günlərdə Azərbaycanda 28 May Respublika Günü qeyd olunacaq. Millət vəkili Azərbaycan Xalq Cümhuriyyətini yaradan insanların adının əbədiləşdirilməsinin vacibliyini bildirib.

Deputat Gülhüseyn Əhmədov isə Kür və Araz çayının daşması ilə bağlı bəzi mətbuat orqanlarında həqiqətə uyğun olmayan məlumatların yer aldığını deyib. Onun sözlərinə görə, bu cür məlumatlar cəmiyyətdə çaşqınlıq yaratmaq üçündür.

Millət vəkili İqbal Ağazadə Azərbaycan Dövlət Neft Akademiyasında baş verən terror hadisəsi ilə bağlı gedən məhkəmə prosesinə narazılıq ifadə edib: “Mətbuat yazır ki, hadisənin sifarişçisi olduğu bildirilən erməni Gürcüstan ərazisində sərbəst gəzir, onunla bağlı heç bir tədbir görülmür. Terrorun gerçək səbəbkarları sərbəst gəzirlər. Əvəzində bir neçə şübhəli bilinən kasıb həbs edilib”.

Deputat Əli Əhmədov isə Azərbaycanın Dağlıq Qarabağ bölgəsində separatçı rejimin keçirdiyi seçkilərin ermənilərin iflasına səbəb olduğunu deyib. Onun sözlərinə görə, bütün beynəlxalq təşkilatlar, o cümlədən ATƏT-in Minsk Qrupunun həmsədr ölkələri bu seçkini tanımayıb: “Lakin nə qədər ki, münaqişə həll edilməyib, bu cür seçkilər keçiriləcək. Biz beynəlxalq hüququn təmin olunmasına çalışmalıyıq” .

MM üzvü Nəsib Nəsibli Kürün daşmasının səbəbini tək təbiətdə axtarmağın düzgün olmadığını deyib. Onun sözlərin görə, bir neçə ildir ki, qrunt sularının qalxmasına baxmayaraq, heç bir tədbir görülməyib.

Spiker Oqtay Əsədov Kür çayının ən gur axan vaxtında saniyədə 1500 kubmetr su keçdiyini, lakin son günlər bu rəqəmin saniyədə 2500 kubmetr təşkil etdiyini deyib: “Dövlət əlindən gələni edir. Bu hadisə bütün dünyada baş verir. Polşada da daşqınlar baş verib”.

Bu arada O. Əsədov yerindən duraraq spikeri hadisədən xəbərsiz olmaqda ittiham edən Pənah Hüseyni bu sahəni bilməyərək danışmaqda ittiham edib: “Siz heç suyun çəkisini bilirsiniz? Bilmədiyiniz şeyləri danışmayın”.

Deputat Rüstəm Xəlilov fəlakət zonasında görülən tədbirlər nəticəsində insan itkisinin qarşısının alındığını deyib: “Bu günə kimi cəmi bir nəfər həyatını itirib. Dövlət baş verən fəlakətin qarşısının alınmasında böyük işlər görür” .

Pənah Hüseyn isə daşqın bölgəsində vəziyyətin pis olduğunu deyib. Onun sözlərinə görə, məsələ gündəliyə daxil edilməli, vəziyyətlə bağlı ölçü götürülməlidir: “Təhqiqat komissiyası yaradılmalıdır. Kürün səviyyəsi düşüb, lakin daşqın yenə də baş verir. Bənd qoyulsa da, daşqın davam edir. Hazırda bütün Sabirabad təbii fəlakət zonasıdır. Salyan rayon İcra Hakimiyyətinin başçısı Əliağa Hüseynov Salyanda intizam yaradıb. Bu cür işlər görülməlidir. Sabirabad fəlakət zonası elan olunmalıdır”.

Spiker məsələyə yenidən münasibət bildirib: “Vəziyyət ciddi təhlil olunur. Su bir yerdən keçməlidir. Ciddi narahatlığa əsas yoxdur”.

Milli Məclis