Daxili siyasət

Ana səhifə

Daxili siyasət

“Məişət zorakılığının qarşısının alınması və məişət zorakılığından zərər çəkən şəxslərin müdafiəsi haqqında” qanun layihəsi parlamentdə birinci oxunuşda qəbul olunub

25 may 2010 11:04 (UTC +04:00)

Bakı. Elbrus Seyfullayev - APA. Milli Məclisin (MM) bugünkü iclasında “Məişət zorakılığının qarşısının alınması və məişət zorakılığından zərər çəkən şəxslərin müdafiəsi haqqında” qanun layihəsi müzakirə olunub. APA-nın xəbərinə görə, sənəd haqqında MM-in İnsan Hüquqları Komitəsinin sədri Rəbiyyət Aslanova məlumat verib. Onun sözlərinə görə, bu qanun yaxın qohumluq münasibətlərindən, birgə və ya əvvəllər birgə yaşamaqlarından sui-istifadə etməklə törədilən zorakılığın, onun doğurduğu mənfi, hüquqi, tibbi və sosial nəticələrinin qarşısının alınması, beynəlxalq standartlara uyğun olaraq məişət zorakılığından zərər çəkən şəxslərin sosial müdafiəsi, hüquqi yardımla təmin edilməsi, habelə məişət zorakılığına səbəb olan halların aradan qaldırılması istiqamətində həyata keçirilən tədbirləri müəyyən edir və tənzimləyir.

Sənəd müzakirə olunarkən çıxış edən deputat Siyavuş Novruzov qanun layihəsinin tərəfdarı kimi çıxış edib. Onun sözlərinə görə, məişət zorakılığından danışarkən təkcə qadınların bu problemlə üzləşdiyini söyləmək düzgün deyil.
S. Novruzov parlamentin iclasında iştirak edən ATƏT və Avropa Şurasının üzvlərinə də müraciət edərək, Avropanın əksər ölkələrinin hətta parlamentlərində məişət zorakılığının hökm sürdüyünü deyib: “Avropa ölkələrinin parlamentlərdə bir də görürsən geyim forması ilə bağlı qərar qəbul edilər. İnsanların geyimlərinə qarışmaq olmaz. Sadə insanlar hərbçi deyil ki, ona geyim forması tətbiq edəsən. İnsan hüquqlarına hörmət etmək lazımdır. Biz İslam dəyərləri ilə yaşayan dünyəvi dövlətik. Lakin bu qanunu da qəbul edərək göstərəcəyik ki, Azərbaycan hər şeyə hazırdır”.

Deputat Zahid Oruc ailə sirlərinin hüquq-mühafizə orqanlarına daşımağın düzgün olmadığını deyib: “Hamı bilir ki, ailə quran şəxslər ilk illərdə müəyyən uyğunsuzluqla üzləşirlər. Bizim ənənəmizdə çox şeylər dəyişməlidir. Azərbaycan qadını cəmiyyətdə kişilərlə bərabər hüquqludur” .

Vitse-spiker Valeh Ələsgərov qanun layihəsində bəzi məntiqi səhvlərə yol verildiyini diqqətə çatdırıb.

Deputat Qənirə Paşayeva deyib ki, dünyanın elə bir ölkəsi yoxdur ki, orada məişət zorakılığı olmasın: “Mən sevinirəm ki, biz bu qanunu qəbul etmək istəyirik. Biz özünə hörmət edən millətin nümayəndələri olaraq bu qanunu qəbul edib mövcud problemləri aradan qaldırmağa çalışacağıq. Bu qanunun qəbul olunması ailələrə müdaxilə kimi başa düşülməməlidir. Ailədəki zorakılıq cəmiyyətə keçə bilər. Biz insan haqqını müdafiə edirik” .

Müzakirələrdən sonra sənəd birinci oxunuşda qəbul edilib.

Məişət zorakılığı