Daxili siyasət

Ana səhifə

Daxili siyasət

Müsavat Partiyası mitinq keçirmək barədə qərar qəbul edib

31 may 2010 14:01 (UTC +04:00)

Bakı. Elnur Məmmədli – APA. Müsavat Partiyası iyunun 12-də mitinq keçirmək barədə qərar qəbul edib. Partiyanın mətbuat xidmətindən APA-ya daxil olan məlumata görə, qərar Divanın bu gün keçirilən iclasında verilib.

İclasda həmçinin Kür və Araz çaylarının daşması nəticəsində bir sıra Aran rayonlarda yaranmış fəlakətli durum haqqında müzakirə aparılıb. Müsavat deputat qrupunun və partiya rəhbərliyinin fəlakət zonasına son səfərindən əldə edilmiş məlumatlar əsasında yerlərdəki real vəziyyət dəyərləndirilib. Vəziyyətdən çıxış kimi Araz çayının suyunun bir hissəsinin əvvəllər mövcud olmuş məcraya yönəldilməsi qərarı riskli, sonadək düşünülməmiş addım kimi qiymətləndirilib və bu qərarın mütəxəssislərlə ciddi müzakirə edilməsi tələb olunub.

Toplantıda parlament seçkilərinə hazırlıq da müzakirə olunaraq dairələr üzrə namizədlərin müəyyənləşdirilməsi işi davam etdirilib.

Müsavat Divanı Fələstinin Qəzza bölgəsinə humanitar yük aparan Türkiyəyə məxsus gəminin İsrail Hərbi Dəniz Qüvvələri tərəfindən Aralıq dənizinin neytral sularında zorakılıqla saxlanılması nəticəsində insan tələfatının olmasından təəssüfləndiyini və narahatlığını da bildirib. Partiya rəhbərliyi hesab edir ki, hadisələrin təhlükəli istiqamətdə davam etməsinin qarşısı təcili alınmalı və məsələlər beynəlxalq hüquqa uyğun həllini tapmalıdır.

Müsavat_Mitinq