Daxili siyasət

Ana səhifə

Daxili siyasət

Əvəz Temirxan: “Azərbaycanda ən böyük psevdomüxalifət İsa Qəmbərdir”

02 iyun 2010 14:57 (UTC +04:00)

Bakı. Elnur Məmmədli - APA. “AXCP-nin Vətəndaş və İnkişaf Partiyası problemi yoxdur. Biz istərdik ki, hərə öz problemi ilə məşğul olsun. “Azadlıq” bloku öz problemlərini özü həll etməyə qadir blokdur”. Bunu APA-ya açıqlamasında Azərbaycan Xalq Cəbhəsi Partiyasının (AXCP) sədr müavini Nurəddin Məmmədli deyib. Müsavat Partiyasının başqanı İsa Qəmbərin “VİP AXCP-nin problemidir” fikirlərinə münasibət bildirən N. Məmmədli qeyd edib ki, hazırda Vətəndaş və İnkişaf Partiyası (VİP) ətrafında yaranan fikirlərin nə dərəcədə həqiqətə uyğun olub-olub olmaması məsələsi araşdırılır: “Məsələ tam araşdırılmadığından biz öz tərəf müqabilimiz barədə fikir söyləmək fikrində deyilik. Biz aparılan araşdırmanın nəticələrinə uyğun münasibət bildirəcəyik. Bu günə qədər isə VİP-lə bağlı AXCP-nin heç bir problemi olmayıb. Digər tərəfdən, hər bir partiya atdığı addımın məsuliyyətini özü daşıyır”.

“Azadlıq” blokunda təmsil olunan Azərbaycan Liberal Partiyasının sədr əvəzi Əvəz Temirxan da blokda VİP probleminin olmadığını deyib. Müsavat başqanının hakimiyyət uğrunda deyil, müxalifətdə hakimiyyətdə olmaq uğrunda mübarizə apardığını deyən Ə. Temirxan İ. Qəmbəri ən böyük psevdomüxalifət adlandırıb: “İsa Qəmbər Rəsulzadə-Elçibəy yolunda yox, öz stilinə görə NKVD-KQB yolundadır, onların üsullarından məharətlə istifadə edir. Müxalifətin parçalanması iqtidara lazımdır, bunu da İsa Qəmbər həyata keçirir. Lalə Şövkət birləşmədən, İsa Qəmbər parçalanmadan danışır. O müxalifət daxilində əcinnə ovuna çıxdı və bu problemləri yaratdı”.

Müsavat Partiyasının Mərkəzi İcra Aparatının rəhbəri Arif Hacılı isə APA-ya Əvəz Temirxanın səsləndirdiyi ittihamların əsassız olduğunu deyib. Onun sözlərinə görə, Demokratiya Uğrunda İttifaq “Azadlıq” bloku-Müsavat-DUİ formatında birgə müzakirələrə başlamaq təklifini irəli sürüb və Müsavat Partiyası bu təklifi qəbul edib: ““Azadlıq” bloku isə bu təklifi qəbul etmədi. Bizdə olan məlumatlara görə, məhz Lalə Şövkətin bu məsələyə etiraz etməsi səbəbindən “Azadlıq” bloku belə bir formatda nəinki əməkdaşlıq etmək, hətta əməkdaşlıq mövzusunda müzakirəyə hazır olmadığını bəyan edib. Bütün bunların fonunda Müsavat Partiyasına qarşı belə ittihamlar irəli sürmək rüsvayçılıqdır. Əvəz və Əvəz kimilərə məsləhət görərdim ki, doğrudan da hakimiyyətə qarşı mübarizə aparırlarsa, hakimiyyətin siyasəti barədə rəy versinlər. Elementar monitorinq aparılsa, görünər ki, istər Əvəz Temirxanın, istər Əli Əliyevin, istərsə də özünü müxalifət adlandıran digər “siyasətçilərin” açıqlamalarının 90 faizi Müsavat Partiyasının siyasətinə həsr olunub. Bu göstərir ki, əslində onlar hakimiyyətə deyil, Müsavata qarşı mübarizə aparırlar”.

İsa_Əli