Daxili siyasət

Ana səhifə

Daxili siyasət

Azərbaycanın Hərbi Doktrinası Milli Məclisin iyunun 8-də keçiriləcək iclasında müzakirəyə çıxarılacaq

03 iyun 2010 10:31 (UTC +04:00)

Bakı. Elbrus Seyfullayev - APA. Azərbaycanın Hərbi Doktrinası Milli Məclisin növbədənkənar sessiyasının iyunun 8-də keçiriləcək iclasında müzakirəyə çıxarılacaq. Bu barədə APA-ya Milli Məclisin Təhlükəsizlik və müdafiə komitəsinin üzvü Zahid Oruc bildirib. O bu gün sənədin komitənin iclasında Müdafiə Nazirliyi və Prezident Administrasiyasının təmsilçiləri ilə birlikdə müzakirə edildiyini deyib. Komitə üzvü bildirib ki, müzakirə zamanı Hərbi Doktrinanın əsas səciyyəvi cəhətləri vurğulanıb: “Real təhlükələr nədən ibarətdir və buna müvafiq olaraq Azərbaycan Silahlı Qüvvələrin hansı addımları atacaq? Heç şübhəsiz ki, müzakirələrdə ən başlıca məqam bu sənəddə Ermənistanın işğalına son qoyulması ilə bağlı atılacaq addımların əksini tapması olub. Sənəd plenar iclasda daha geniş müzakirə olunacaq”.

Z. Oruc deyib ki, Azərbaycanın işğal olunmuş ərazilərində sürətlə silahlanma, qonşu dövlətlərin Azərbaycana qarşı ərazi iddiası, o cümlədən ərazi sularında hərbi bazaların yaradılması, qoşun qruplaşmalarının formalaşdırılması və digər müddəalar sənəddə əks olunub: “Sənəddə NATO ilə əməkdaşlıq, Kütləvi Qırğın Silahlarının yayılmamasına münasibət də yer alıb”.

Komitə üzvü deyib ki, Azərbaycan ərazilərində xarici hərbi bazaların yerləşdirilməsi “Milli təhlükəsizlik haqqında” qanunda yasaq olunsa da, Hərbi Doktrina layihəsində istisna nəzərdə tutulur: “Burada qeyd olunur ki, gərəkən şəraitlərdə Azərbaycan belə bir səlahiyyəti özündə saxlayır. Mən təklif etdim ki, belə bir səlahiyyətin saxlanması Azərbaycanın manevr müstəvisini genişləndirir. Ümumiyyətlə, bu sənədi Azərbaycanın ərazilərinin işğaldan azad edilməsi üçün Silahlı Qüvvələr qarşısında vəzifə qoyan doktrina saymaq olar”.

Sənəd müzakirələrdən sonra Milli Məclisin plenar iclasına tövsiyə olunub.

doktrina